Qazaqstandyq stýdentter robototehnıkadaǵy úzdik sheshimi úshin júlde aldy
ASTANA. KAZINFORM — Gonkongta ótken ABU Robocon 2026 robototehnıkadan halyqaralyq chempıonatynda Qazaqstan atynan qatysqan Nazarbaev Ýnıversıtetiniń BULAN komandasy Mabuchi Motor Award júldesine ıe boldy. Baıqaýǵa 21 eldiń ýnıversıtet komandalary qatysty.
Mabuchi Motor Award ınjenerlik sheshimderdiń biregeıligi, mehanıkalyq konstrýktsııanyń sapasy, sondaı-aq mehanıkalyq, elektrondyq jáne baǵdarlamalyq komponentterdi tıimdi úılestire bilgeni úshin beriledi.
Qazaqstannyń ABU Robocon 2026 chempıonatyna qatysýy elimizdiń jeti jyldyq úzilisten keıin halyqaralyq jarysqa qaıta oralýy boldy. Bıyl ulttyq irikteýdi ótkizý jáne el quramasyn jasaqtaý jumystaryn USTEM Foundation QQ uıymdastyrdy.
Ulttyq kezeń 1 shildede Almaty Tech Cup aıasynda ótti. Onyń qorytyndysy boıynsha Nazarbaev Ýnıversıtetiniń BULAN komandasy jeńimpaz atanyp, Gonkongtaǵy halyqaralyq fınalda Qazaqstan atynan qatysý quqyǵyna ıe boldy.
Qazaqstan quramasyna mehanıka, elektronıka, baǵdarlamalaý, dızaın jáne jobalardy basqarý baǵyttaryn qosa alǵanda, túrli mamandyqtar boıynsha bilim alyp júrgen 28 stýdent endi. Mundaı pánaralyq tásil robototehnıkalyq sheshimderdi ázirleý men daıyndaý barysynda ınjenerlik jáne tsıfrlyq quzyretterdi ushtastyrýǵa múmkindik berdi.
Halyqaralyq kezeńde Qazaqstan atynan Meıirjan Tazdarbaı, Temirlan Amangeldi, Aımedet Taýfık, Farshed Ibrohımov jáne Dastan Mýsrepov óner kórsetti.
Mabuchi Motor Award — shaǵyn elektr qozǵaltqyshtaryn óndiretin japondyq Mabuchi Motor kompanııasynyń arnaıy júldesi. Ol jobalaýda biregeı tásil, mehanıkalyq ınjenerııanyń joǵary deńgeıin jáne tehnologııalyq sheshimderdi keshendi qoldaný sheberligin kórsetken komandalarǵa tabystalady.
Qazaqstandyq komandanyń ABU Robocon 2026 chempıonatyndaǵy nátıjesi stýdenttik ınjenerııa men robototehnıka salasyndaǵy áleýettiń artyp kele jatqanyn, sondaı-aq qazaqstandyq jas ázirleýshilerdiń halyqaralyq deńgeıdegi básekege qabilettiligin kórsetedi.
Aıta ketelik qazaqstandyq oqýshylar robototehnıkadan halyqaralyq chempıonatta 23 júlde ıelengen edi.
