Qazaqstandyq stýdentter Qytaıdaǵy ǵylymı jarysta eki altyn medal jeńdi

ALMATY. KAZINFORM — Qytaıda ótken halyqaralyq ǵylymı jarysta qazaqstandyq stýdentter top jardy.

Ál-Farabı atyndaǵy QazUÝ málimetinshe, ýnıversıtettiń bıotehnologııa kafedrasynda bilim alatyn stýdentter Qytaıda ótken The 2025 China Belt and Road International Undergraduate Medical Innovation Competition atty halyqaralyq baıqaýyna qatysyp, eki birdeı altyn medaldi jeńip aldy.

Bedeldi jarysqa álemniń 20 elinen 4000-nan astam stýdent qatysyp, úzdik ǵylymı jobalaryn usynǵan. Qazaqstan atynan ǵylymı baıqaýǵa Ál-Farabı atyndaǵy QazUÝ-dyń eki komandasy qatysqan.

Birinshi top quramynda komanda kapıtany Temirhan Qazanbasov, sondaı-aq stýdentter Mıra Dáýlet, Chýtın Tao, Shýı Tszı jáne Amına Davletcharova boldy. Komandaǵa bıologııa ǵylymdarynyń kandıdaty, qaýymdastyrylǵan professor Aıda Qystaýbaeva jáne QHR-dan shaqyrylǵan maman — Venıa Hoý jetekshilik etti.

Ekinshi komandanyń músheleri — Tımýr Kerimov, Gúlsaıa Asqar ıAohýeı Pen, Hao Chen boldy. Komandany Damıra Eltokova basqaryp, bıotehnologııa kafedrasynyń aǵa oqytýshysy, PhD Dına Shoqataeva ǵylymı jetekshilik etti.

— Bul jeńis — stýdentterdiń tabandylyǵy men eńbeginiń, sondaı-aq úılesimdi komandalyq jumystyń aıqyn nátıjesi. Olar tek bilimderin ǵana emes, ózderiniń biregeı ıdeıalaryn usynyp, halyqaralyq deńgeıde ozyq jobalar qatarynan kórine bildi, — dep habarlady ýnıversıtten.

Eske salaıyq, buǵan deıin Qazaqstannyń IT jobasy halyqaralyq baıqaýda jeńiske jetti.