Qazaqstandyq stýdentter Qytaıda el namysyn qorǵaıdy

ASTANA. KAZINFORM — Qazaq ulttyq horeografııa akademııasynyń stýdentteri Beıjiń bı akademııasynyń «Sulýlyqpen úndestik: Bı boıynsha bilim berýdegi álemdik almasý» atty halyqaralyq kórsetilimine qatysady, dep habarlaıdy Mádenıet jáne aqparat mınıstrligi.

Halyqaralyq jobanyń bastamashysy — Beıjiń bı akademııasy, al is-shara Bı biliminiń dúnıejúzilik alıansy (World Dance Education Alliance) qoldaýymen júzege asady.

— Dance Theatre sahnasynda ótetin is-sharaǵa 38 elden 70-ten astam jetekshi horeografııalyq oqý orny qatysýda. Beıjiń bı akademııasy júrgizgen qatań irikteý nátıjesinde Qazaq ulttyq horeografııa akademııasynyń stýdentteri úzdik qatysýshylardyń qataryna enip, Qazaqstan atynan halyqaralyq sahnada óner kórsetý mártebesine ıe boldy, — delingen mınıstrlik taratqan aqparatta.

Kórsetilim baǵdarlamasyna P. I. Chaıkovskııdiń «Uıqydaǵy arý» baletinen Avrora men Dezıreniń pa-de-de nómiri engen.

Mádenıet jáne aqparat mınıstrligi atap ótkendeı, akademııa stýdentteriniń bul halyqaralyq jobaǵa qatysýy qazaqstandyq balet ónerin álemdik deńgeıde tanylýyna yqpal eteri anyq.

Budan buryn «Astana Opera» Omanda «Koppelııa» baletin usynatynyn jazdyq.