Qazaqstandyq stýdentter halyqaralyq bilim saıysynda qola júlde qanjyǵalady
ASTANA. KAZINFORM — Qytaı Halyq Respýblıkasynyń Shaoıan qalasynda «2025 China Grand Final» aıasynda ótken «BRICS Skills Competition» halyqaralyq chempıonatynda qazaqstandyq komanda jeńis tuǵyrynan kórindi. Bul týraly Oqý-aǵartý mınıstrligi málim etti.
Chempıonatqa Qazaqstan, Qytaı, Úndistan, Reseı, Bangladesh, Laos, Gana, Nıgerııa, Rýanda jáne Ońtústik Afrıka elderinen 82 komanda qatysty. Aıta ketý kerek, bul chempıonat bolashaq mamandardyń zamanaýı tehnologııalar men tsıfrlyq quzyretterin halyqaralyq deńgeıde synaıtyn mańyzdy alań sanalady.
Qazaqstandyq komanda joǵary tehnıkalyq daıyndyq pen úılesimdi komandalyq jumystyń nátıjesinde úzdikter qataryna endi. BRICS-FS-16 / Internet of Things («Internet zattar») baǵyty boıynsha ótken halyqaralyq fınalda Qazaqstan namysyn qorǵaǵan komanda qola medal ıelendi.
— Bul jetistik — otandyq tehnıkalyq jáne kásiptik bilim berý uıymdarynyń halyqaralyq standarttarǵa saı maman daıarlap otyrǵanyn aıqyn dáleli, — deıdi Oqý-aǵartý mınıstrliginiń Tehnıkalyq jáne kásiptik bilim berý departamenti dırektorynyń orynbasary Aqzıra Qasymova.
Júldegerler N.Bekbosynov atyndaǵy Mańǵystaý energetıkalyq kolledjiniń stýdentteri Súndet Baıanov, Anýar Ramazan, komanda jetekshisi — Ádilbaı Jaqsylyq. Halyqaralyq fınal barysynda qatysýshylar «Internet zattar» baǵyty boıynsha kúrdeli praktıkalyq tapsyrmalardy oryndap, smart-júıelerdi jobalaý, baǵdarlamalaý jáne ıntegratsııalaý boıynsha ózderiniń kásibı sheberlikterin kórsetti.
Buǵan deıin habarlanǵandaı, qazaqstandyq oqýshylar Sochıde ótken olımpıadada 6 medal ıelendi.