Qazaqstandyq stýdentter egin ónimdiligin boljaıtyn jasandy ıntellekt platformasyn ázirledi

ASTANA. KAZINFORM – Ualikhanov University stýdentteri egistik alqaptarynyń jaı-kúıin baǵalap, aýyl sharýashylyǵy daqyldarynyń ónimdiligin aldyn ala boljaýǵa múmkindik beretin Sator jasandy ıntellekt platformasyn ázirledi, dep habarlady Ǵylym jáne joǵary bilim mınıstrligi.

r
Foto: Ǵylym jáne joǵary bilim mınıstrligi

Jobany Data Science bilim berý baǵdarlamasynyń 3-kýrs stýdentteri Movsar Býzýrtanov pen Danııal Nurlanov jasaǵan.

Olardyń ázirlemesi Nazarbaev Ýnıversıtetinde ótken National Founder Cup Astana 2026 startaptar baıqaýynda birinshi oryn aldy. Baıqaýǵa qatysqan 16 komandanyń arasynan Sator jobasy agroónerkásip salasyna arnalǵan ınnovatsııalyq sheshimimen erekshelengen.

Joba AI-SANA baǵdarlamasy aıasynda bastaý alǵan. 2026 jylǵy mamyrda stýdentter ýnıversıtette uıymdastyrylǵan jasandy ıntellekt jobalary baıqaýyna AgroMind jobasymen qatysyp, jeńimpaz atanǵan.

Nátıjesinde jas ázirleýshiler jobalaryn damytý úshin 1,5 mln teńge kóleminde syıaqy alǵan. Keıin tehnologııalyq sheshimdi jetildirip, Sator ataýymen damytýdy jalǵastyrǵan.

– Sator platformasy spýtnıktik monıtorıng derekterin, meteorologııalyq kórsetkishterdi, topyraq sıpattamalaryn jáne egin ónimdiligi jónindegi tarıhı statıstıkalyq málimetterdi biriktiredi. Jasandy ıntellekt algorıtmderi osy derekterdi keshendi taldaý arqyly aýyl sharýashylyǵy daqyldarynyń ónimdiligin aldyn ala boljaýǵa múmkindik beredi. Bul agroóndirýshilerge óndiristik úderisterdi tıimdi josparlaýǵa, yqtımal táýekelderdi baǵalaýǵa jáne naqty derekterge negizdelgen basqarýshylyq sheshimder qabyldaýǵa kómektesedi, – delingen ýnıversıtet aqparatynda.

Qazirgi ýaqytta stýdentter platformany 178 egistik alqabynyń derekteri negizinde synaqtan ótkizgen.

Ázirleýshilerdiń aıtýynsha, mundaı tehnologııalar aýyl sharýashylyǵy óndirisiniń tıimdiligin arttyrýǵa, jer resýrstaryn utymdy paıdalanýǵa jáne egin ónimdiligin boljaý tásilderin jetildirýge múmkindik beredi.

Ásirese agrarlyq áleýeti joǵary Aqmola oblysy sııaqty óńirlerde platformany qoldanýdyń múmkindigi keń.

Qazir stýdentter jobany aýyl sharýashylyǵy óndirisine engizý úshin elimizdiń agroónerkásip salasyndaǵy kompanııalarymen kelissóz júrgizip jatyr.

2027 jyly ázirleýshiler platformany naqty óndiristik jaǵdaıda synaqtan ótkizip, ónimdilikti boljaý dáldigin baǵalaýdy josparlap otyr. Sonymen qatar mashınalyq oqytý algorıtmderin jetildirý jáne tehnologııany naryqqa shyǵarýǵa daıyndaý kózdelgen.

Aıta keteıik, buǵan deıin Qorqyt ata atyndaǵy Qyzylorda ýnıversıtetiniń stýdenti Nurdáýlet Dúzenov aýyl sharýashylyǵy resýrstaryn tıimdi paıdalanýǵa arnalǵan AgriX jasandy ıntellekt platformasyn ázirlegen bolatyn. Joba egistik alqaptarynyń derekterin taldap, sýarý men tyńaıtqysh qoldaný boıynsha usynymdar beredi.