Qazaqstandyq stýdentter ázirlegen JI jobalary óndiriske engizilip jatyr
ASTANA. KAZINFORM – AI-Sana baǵdarlamasy aıasynda qazaqstandyq joǵary oqý oryndary jasandy ıntellektke negizdelgen ınnovatsııalyq jobalardy ázirlep, olardy bilim berý, ónerkásip, densaýlyq saqtaý jáne memlekettik basqarý salalaryna engizip jatyr, dep habarlaıdy Ǵylym jáne joǵary bilim mınıstrligi.
Mınıstrliktiń málimetinshe, baǵdarlamanyń basty nátıjeleriniń biri – stýdentter men ýnıversıtettik komandalardyń oqý jobalarynan naqty sektorda qoldanylatyn ónimderdi ázirleýge kóshýi. Qazir birqatar joba pılottyq kezeńnen ótip, halyqaralyq seriktester men ınvestorlardyń qyzyǵýshylyǵyn týdyryp otyr.
– Búginde AI-Sana baǵdarlamasyna qatysýshylar jasandy ıntellekt tehnologııalaryn meńgerip qana qoımaı, ártúrli salalarda qoldanylatyn ózderiniń ınnovatsııalyq sheshimderin ázirleýde. Kóptegen joba pılottyq engizý kezeńinen ótip, halyqaralyq seriktesterdiń qoldaýyna jáne ınvestorlardyń qyzyǵýshylyǵyna ıe boldy, – delingen habarlamada.
Baǵdarlama aıasynda Astana IT University kún panelderindegi aqaýlardy drondardyń kómegimen anyqtaıtyn EnergyDronesAI júıesin ázirledi. Joba Shell kompanııasynyń halyqaralyq grantyn jeńip alyp, Qytaıdaǵy halyqaralyq baıqaýda altyn medal ıelengen.
Shyǵys Qazaqstan tehnıkalyq ýnıversıteti shahtalardaǵy qozǵalysty baqylaýǵa jáne óndiristik qaýipsizdikti arttyrýǵa arnalǵan Smart Safety Monitor júıesin jasap shyqqan. Bul joba Dúnıejúzilik banktiń granttyq qoldaýyna ıe boldy.
– Erekshe qajettilikteri bar azamattarǵa arnalǵan tehnologııalardy damytý da baǵdarlamanyń mańyzdy baǵyttarynyń biri. L.N. Gýmılev atyndaǵy Eýrazııa ulttyq ýnıversıteti qazaq tilindegi medıakontentti avtomatty túrde ymdaý tiline aýdaratyn SignBridge AI júıesin engizýde. Qazir bul tehnologııa «Jibek Joly» telearnasynyń baǵdarlamalarynda qoldanylyp keledi, – dep habarlady mınıstrlik.
Sonymen qatar Qorqyt ata atyndaǵy Qyzylorda ýnıversıteti SeoulTech fılıalymen birlesip fıshıngtik shabýyldar men tsıfrlyq qaýipterden qorǵaýǵa arnalǵan PhishGuard AI platformasyn ázirleýde. Qazirgi ýaqytta atalǵan sheshimdi prokýratýra organdaryna engizý máselesi pysyqtalyp jatyr.
Al Ál-Farabı atyndaǵy Qazaq ulttyq ýnıversıteti Astana Hub-pen birlesip startaptardy onlaın-ınkýbatsııalaýǵa arnalǵan AI Startify Incubator platformasyn damytýda.
Aıta keteıik, Almaty oblysynda JI zańsyz kóshi-qon derekterin anyqtaýǵa kómektesti.
