Qazaqstandyq stýdentter avtokólik boıaýyndaǵy aqaýdy anyqtaıtyn JI-júıe jasady
ASTANA. KAZINFORM — Qazaqstandyq stýdentter jasandy ıntellektini óndiriste qoldana bastady. Sonyń biri — Qostanaı óńirlik ýnıversıtetiniń stýdentteri Allur kompanııasymen birlesip, avtokóliktiń lak-boıaý qabatyndaǵy aqaýlardy avtomatty túrde anyqtaıtyn JI-júıe ázirledi. Bul týraly Ǵylym jáne joǵary bilim mınıstri Saıasat Nurbek aıtyp berdi.
Mınıstrdiń aıtýynsha, elimizde tsıfrlyq quzyreti joǵary ınjenerlerdi daıarlaý eki negizgi baǵyt boıynsha júrgizilip jatyr. Birinshisi — stýdentterdiń álemdik bilim berý baǵdarlamalaryna qoljetimdiligin keńeıtý. Osy maqsatta Coursera platformasy arqyly bolashaq ınjenerler zamanaýı tehnologııalar boıynsha halyqaralyq sertıfıkat alyp keledi.
— Sońǵy úsh jylda stýdentter avtomobıl ónerkásibine qatysty 80-nen astam kýrs boıynsha 3 myńnan astam sertıfıkat aldy, — dep atap ótti Saıasat Nurbek.
Ekinshi baǵyt — jasandy ıntellektini joǵary bilim berý júıesine engizý. Munda AI-Sana baǵdarlamasy arqyly stýdentterdiń basym bóligi JI negizderin meńgerdi, al 60 myńnan astam stýdent kásipkerlik qyzmette jasandy ıntellektti paıdalaný kýrstarynan ótti.
— Stýdentter oqý barysynda naqty óndiristik mindetterdi sheshýge qatysady. Sonyń bir mysaly — Ahmet Baıtursynuly atyndaǵy Qostanaı óńirlik ýnıversıteti stýdentteriniń Allur kompanııasymen birlesip júzege asyryp jatqan NOVA–Allur jobasy. Joba aıasynda avtomobılderdiń lak-boıaý jabynyndaǵy aqaýlardy avtomatty anyqtaıtyn jasandy ıntellekt júıesi ázirlendi.
Osyndaı tájirıbeni aldaǵy ýaqytta keńinen taratamyz, — dedi Ǵylym mınıstri.
Aıta keteıik, Úkimet otyrysynda mashına jasaý salasyn damytý máselesi qaralyp jatyr.
Qazaqstannyń 19 oqý ornynda avtoónerkásip mamandary daıarlanyp jatyr.
