Qazaqstandyq stýdentter áskerı kafedraǵa túsý úshin ótinishti onlaın tapsyra alady
ASTANA. KAZINFORM – 2026 jylǵy 1 aqpannan bastap qazaqstandyq joǵary oqý oryndarynyń stýdentteri áskerı kafedraǵa oqýǵa túsýge ótinishti eGov.kz portaly arqyly tolyq onlaın formatta bere alady.
Qujat tapsyrýdyń jańa tártibi ofıtserler men zapastaǵy serjanttardy daıarlaý baǵdarlamalaryna konkýrsqa qatysý protsesin jeńildetip, elimizdiń barlyq óńirindegi stýdentter úshin ony ashyq ári qoljetimdi etedi.
Áskerı kafedrada oqý stýdentterge negizgi bilimmen qatar qosymsha kásibı daıarlyqtan ótýge múmkindik beredi. Oqý kýrsyn aıaqtaǵannan keıin túlekterge «zapastaǵy leıtenant» nemese «zapastaǵy kishi serjant» áskerı ataǵy beriledi.
eGov.kz portaly arqyly ótinishti kúndizgi bólimde oqıtyn bakalavrıat stýdentteri tapsyra alady. Ótinishterdi qabyldaý 2026 jylǵy 30 qyrkúıekke deıin jalǵasady.
«Buryn stýdentter qujattardy tikeleı joǵary oqý oryndarynda qaǵaz túrinde tapsyrýǵa májbúr bolatyn. Biz azamattardyń memleketpen ózara is-qımylyn jeńildetý jáne oflaın júginýdi azaıtý úshin suranysqa ıe qyzmetterdi kezeń-kezeńimen tsıfrlyq formatqa kóshirýdi jalǵastyryp kelemiz. Áskerı kafedralarǵa onlaın ótinish qabyldaý – osy baǵyttaǵy taǵy bir mańyzdy qadam», – dedi Ulttyq aqparattyq tehnologııalar AQ basqarma tóraǵasy Dáýlet Bekmanov.
Ótinish berýdiń jańa formaty tek yńǵaılylyqty arttyryp qana qoımaı, tekserý protsesterin de avtomattandyrýǵa múmkindik beredi. Ótinim jiberiler aldynda júıe úmitker týraly psıhonevrologııalyq, narkologııalyq jáne týberkýlez dıspanserleri boıynsha málimetterdi, sondaı-aq múgedektiginiń jáne sottylyǵynyń bar-joǵyn avtomatty túrde tekseredi. Jeke basyn kýálandyratyn derekter men bilim týraly málimetter memlekettik aqparattyq júıelerden paıdalanýshynyń qatysýynsyz alynady. Baılanys telefony Mobıldi azamattar bazasynda tirkelgen jaǵdaıda avtomatty túrde toltyrylady, al tirkelmegen bolsa qolmen engiziledi.
Qyzmetti paıdalaný úshin stýdent eGov.kz portalynda avtorızatsııadan ótip, «Basty bet» – «Azamattarǵa» – «Áskerı esep jáne qaýipsizdik» – «Áskerı qyzmet» bólimderi arqyly «Joǵary jáne joǵary oqý ornynan keıingi bilim berý uıymynda áskerı kafedraǵa oqýǵa túsý úshin ótinishterdi qabyldaý» qyzmetin tańdap, onlaın suraý joldaıdy. Ótinishtiń qaralý nátıjesi paıdalanýshynyń jeke kabınetinde «Qyzmetterdi alý tarıhy» bóliminde kórsetiledi. Oń sheshim qabyldanǵan jaǵdaıda ýákiletti tulǵanyń elektrondyq tsıfrlyq qoltańbasymen rastalǵan elektrondyq qujat usynylady, al bas tartylǵan jaǵdaıda sebepteri kórsetilgen dáleldi habarlama jiberiledi.
Ótinishti qaraý merzimi ony tapsyrǵan sátten bastap bes jumys kúninen aspaıdy.
Qyzmet QR Jasandy ıntellekt jáne tsıfrlyq damý mınıstrligi Memlekettik qyzmetter komıtetiniń, «Ulttyq aqparattyq tehnologııalar» AQ men QR Qorǵanys mınıstrligi birlesken jumysynyń nátıjesinde iske asyryldy.
Aıta keteıik, Qarýly kúshter bólimsheleriniń úılestirý jattyǵýlaryna 7 myńǵa jýyq áskerı qyzmetshi qatysty.