Qazaqstandyq stýdentter 2027 jyldan bastap Japonııada tegin bilim ala alady
ASTANA. KAZINFORM – Tokyo Metropolitan University (TMU) shetel azamattaryn Tokyo Global Partner Scholarship Program (Tokyo GP) stıpendııalyq baǵdarlamasyna qatysýǵa shaqyrady. Baǵdarlama daryndy stýdentterge Japonııada magıstratýra nemese doktorantýra baǵdarlamalary boıynsha bilimin jalǵastyrýǵa múmkindik beredi.
Baǵdarlama álemniń túkpir-túkpirinen perspektıvaly stýdentterdi tartýǵa, sondaı-aq halyqaralyq bilim berý jáne ǵylymı yntymaqtastyqty damytýǵa baǵyttalǵan.
Tokyo GP baǵdarlamasy aıasynda oqýǵa túsý jarnasy men oqý aqysy, halyqaralyq áýe bıletteriniń shyǵyndary tolyq óteledi, sondaı-aq aı saıyn 150 000 japon ıenasy mólsherinde stıpendııa tólenedi.
Baǵdarlamaǵa Azııa elderi men óńirlerinde bilim alyp jatqan TMU-dyń seriktes ýnıversıtetteriniń stýdentteri, sondaı-aq tıisti elderdegi ǵylymı-zertteý uıymdarynyń, memlekettik organdar men kompanııalardyń qyzmetkerleri qatysa alady.
Bilim berý Science, Urban Environmental Sciences, Systems Design, Human Health Sciences jáne basqa da baǵyttar boıynsha júzege asyrylady. Sonymen qatar jekelegen bilim berý baǵdarlamalary tek japon tilinde oqytylady.
Baǵdarlamaǵa qatysý úshin:
1. Tokyo Global Partner Scholarship Program baǵdarlamasynyń resmı saıtyna ótý kerek.
2. Tokyo Metropolitan University quramyndaǵy Graduate School-dy tańdaý. Tańdaý bilim alǵysy keletin baǵytqa sáıkes júzege asyrylady.
3. Master’s nemese PhD deńgeıindegi bilim berý baǵdarlamasyn tańdaý kerek.
Magıstratýraǵa túsý úshin bakalavr dárejesi, al doktorantýraǵa túsý úshin magıstr dárejesi nemese oǵan teńestirilgen biliktilik qajet.
4. Tokyo GP baǵdarlamasynyń belgilengen talaptaryna sáıkestigin tekserý kerek.
Úmitkerdiń GPA kórsetkishi keminde 2,30 bolýy tıis. Sonymen qatar aǵylshyn tilin CEFR boıynsha B2 nemese odan joǵary deńgeıde meńgergenin tıisti biliktilik qujaty nemese sertıfıkattyq test nátıjesi arqyly rastaýy ne japon tilin JLPT boıynsha N2 nemese odan joǵary deńgeıde bilýi qajet. Budan bólek, úmitker baǵdarlamanyń aýmaqtyq jáne seriktestik talaptaryna sáıkes kelýi tıis.
5. Tańdalǵan Graduate School-dyń Application Guidelines qujatymen tanysý qajet.
Qujatta qajetti qujattar tizimi, ótinim berý merzimderi men tártibi kórsetiledi. Talaptar men merzimder Graduate School jáne tańdalǵan bilim berý baǵdarlamasyna qaraı erekshelenýi múmkin.
6. Ótinimdi tańdalǵan Tokyo Metropolitan University Graduate School-yna belgilengen tártippen jáne kórsetilgen merzimde berý. Іrikteý jáne qabyldaý rásiminen ótý.
7. Úmitker tıisti Graduate School belgilegen irikteý kezeńderinen ótedi. Іrikteý formaty men talaptary tańdalǵan baǵdarlamanyń Application Guidelines qujatynda kórsetiledi.
8. Іrikteýden sátti ótken jaǵdaıda stıpendııa alý. Tokyo GP baǵdarlamasy qabyldaý (emtıhan) jarnasynan, oqýǵa qabyldaý jarnasynan jáne oqý aqysynan bosatýdy, aı saıyn 150 000 ıen mólsherinde stıpendııa tóleýdi, sondaı-aq oqý aıaqtalǵannan keıin Japonııaǵa barý jáne keıin elge qaıtý úshin áýe bıletteriniń aqysyn óteýdi kózdeıdi. Sonymen qatar ýnıversıtet turǵyn úı izdeýge qoldaý kórsetedi.
Qarjylandyrý merzimi magıstratýra baǵdarlamalary úshin 2 jylǵa deıin, PhD baǵdarlamalary úshin 3 jylǵa deıin beriledi.
Oqý 2027 jylǵy 1 sáýirde bastalady. Qujattardy tapsyrýdyń naqty merzimi tańdalǵan Graduate School-ǵa baılanysty belgilenedi jáne tıisti Application Guidelines qujatynda kórsetiledi.
Qatysý sharttary, qoljetimdi bilim berý baǵdarlamalary jáne ótinim berý tártibi týraly tolyq aqparat Tokyo Metropolitan University resmı saıtynda ornalastyrylǵan.
