Qazaqstandyq stýdent HOK baǵdarlamasyna qabyldandy

ASTANA.KAZINFORM - Stýdent Eńlik Ultaraqova Qazaqstan Ulttyq Olımpıadalyq komıtetiniń qoldaýymen Halyqaralyq Olımpıadalyq komıteti (HOK) uıymdastyrǵan bedeldi IOC Young Leaders baǵdarlamasyna qatysatyn 25 qatysýshynyń qataryna kirdi. Bul týraly QR UOK habarlady.

IOC Young Leaders – bul sportty paıdalana otyryp, áleýmettik máselelerdi sheshýge umtylatyn jas kóshbasshylarǵa qarjylyq, bilim berý jáne saraptamalyq qoldaý kórsetetin tórt jyldyq halyqaralyq baǵdarlama.

Ulttyq Olımpıadalyq komıteti Eńliktiń ótinish berý, suqbat uıymdastyrý jáne qajetti qujattardy daıyndaý úderisinde jan-jaqty kómek kórsetti. Sonyń nátıjesinde ol baǵdarlamaǵa qabyldanyp, óz bastamasyn júzege asyrý múmkindigine ıe boldy.

Nazarbaev Ýnıversıtetiniń magıstranty, ári sporttyq medıtsına salasynyń mamany retinde sportshy Qazaqstan jastaryn (14–21 jas) sportqa tartý jáne olardyń densaýlyq týraly habardarlyǵyn arttyrýǵa baǵyttalǵan jobany ázirledi. Bul baǵdarlamaǵa bilim berý modýlderi, sheberlik sabaqtary jáne paıdaly kontentpen qamtylǵan onlaın-platforma kiredi.

Onyń tujyrymdamasy Qazaqstan UOK-niń jastar arasynda salaýatty ómir saltyn nasıhattaý jáne sport mádenıetin damytýǵa baǵyttalǵan basymdyqtaryna tolyq sáıkes keledi.

IOC Young Leaders baǵdarlamasy aıasynda Eńlik jobasyn júzege asyrý úshin 10 000 shveıtsar franki kóleminde grant, sondaı-aq halyqaralyq bilim berý semınarlary men netvorkıngke qatysý múmkindigin alady.

Aıta keteıik, Qazaqstan Ulttyq Olımpıadalyq komıteti sporttyq bilim berýge baǵyttalǵan bastamalardy belsendi qoldaıdy. Bul komıtettiń olımpıadalyq qundylyqtardy ilgeriletý jáne sport mamandarynyń biliktiligin arttyrýǵa jaǵdaı jasaý jónindegi basymdyqtaryna saı keledi. Sonymen qatar UOK sportshylardy tek jarystar men jattyǵýlar kezinde ǵana emes, olardyń sporttyq mansabyn aıaqtaǵannan keıin de qoldaýdy jalǵastyrady.

Olga Rypakova HOK prezıdenti Tomas Bahpen kezdeskenin jazǵan bolatynbyz.