Qazaqstandyq stýdent halyqaralyq baıqaýdyń qola júldegeri atandy
ASTANA. KAZINFORM — Túrkistan oblysyndaǵy Kentaý kópsalaly kolledjiniń stýdenti halyqaralyq baıqaýda júldeli oryn ıelendi. Bul týraly Oqý-aǵartý mınıstrliginiń baspasóz qyzmeti habarlady.
Kolledjdiń «Ǵımarattar men qurylystardy salý jáne paıdalaný» mamandyǵynyń 2-kýrs stýdenti Ryshan Aqmaral Majarstan astanasy Býdapesht qalasynda ótken halyqaralyq jarysta III oryn aldy.
Baıqaý «Keskindeme jáne sándik jumystar» quzyrettiligi boıynsha uıymdastyrylyp, halyqaralyq dostyq kezdesý aıasynda ótti. Oǵan Majarstan, Italııa, Chehııa, Qazaqstan jáne Ulybrıtanııa elderiniń qatysýshylary qatysty. Jarys barysynda qatysýshylar kásibı sheberlikterin, shyǵarmashylyq qabiletterin jáne daıyndyq deńgeıin kórsetti. Ryshan Aqmaral teorııalyq bilimin tájirıbemen ushtastyryp, tapsyrmalardy sapaly ári ýaqytynda oryndap, sarapshylardyń joǵary baǵasyna ıe boldy.
Aıta keteıik, Aqmaral buǵan deıin Túrkistan oblystyq chempıonatynda osy quzyrettilik boıynsha I oryn alyp, respýblıkalyq kezeńge joldama alǵan edi. Sonymen qatar ol WorldSkills Kazakhstan 2025 respýblıkalyq chempıonatynyń altyn medal ıegeri jáne RegionSkills 2024–2025 chempıonattarynyń jeńimpazy. Qazirgi ýaqytta stýdent WorldSkills Shanghai 2026 halyqaralyq chempıonatyna daıyndalyp jatyr.
Eske salsaq Qytaı ýnıversıtetterine grantqa usynylǵan 102 qazaqstandyqtyń tizimi jarııalanǵan edi.
