Qazaqstandyq stýdent álemdik deńgeıdegi jasandy ıntellekt baıqaýynda birinshi oryn aldy
ASTANA. KAZINFORM — Qazaqstandyq stýdent halyqaralyq bedeldi BRICS Skills Development and Technological Innovation Competition chempıonatynda jasandy ıntellekt salasy boıynsha altyn medal jeńip aldy. Bul týraly Oqý-aǵartý mınıstrliginiń baspasóz qyzmeti habarlady.
«Bir beldeý, bir jol» bastamasy jáne Jumysshy mamandyqtar jyly aıasynda Qazaqstan Respýblıkasy men Qytaı Halyq Respýblıkasynyń jasandy ıntellekt baǵytynda bilim berý yntymaqtastyǵy artyp keledi.
Kókshetaý joǵary kolledjiniń stýdenti Ilıas Gatın «2nd Artificial Intelligence Deep Learning Application Technology Competition» halyqaralyq baıqaýynda birinshi orynǵa ıe boldy. Baıqaýǵa Kongo, Kamerýn, Ońtústik Koreıa, Japonııa jáne ózge de elderden kelgen 20 úzdik stýdent qatysyp, jasandy ıntellekt pen tereń oqytý tehnologııalary boıynsha ozyq jobalaryn usyndy.
Qatysýshylardyń kásibı daıarlyǵy, praktıkalyq biliktiligi jáne ınnovatsııalyq sheshimderi halyqaralyq sarapshylar tarapynan joǵary talaptar boıynsha baǵalandy.
Aıta keteıik, Ilıas Gatın buǵan deıin de birqatar respýblıkalyq jáne halyqaralyq jarysta joǵary nátıje kórsetken. Ol WorldSkills Kazakhstan–2024 ulttyq chempıonatynda «Mobıldi qosymshalardy ázirleý» quzyrettiligi boıynsha kúmis medal ıelengen. Sonymen qatar, ProIT komandasynyń quramynda «Inform Defence Hackathon» hakatonynda І oryndy jeńip alǵan.
Bul jetistik qazaqstandyq kolledj stýdentteriniń jasandy ıntellekt, tsıfrlyq tehnologııalar jáne ınnovatsııa salasynda álemdik deńgeıde básekege qabiletti ekenin aıqyn kórsetedi.
Aıta ketelik UBT transformatsııasy 2027 jyly bastalatyny týraly jazǵan edik.