Qazaqstandyq stýdent adam bara almaıtyn qaýipti jerlerde jumys isteıtin robot shyǵardy
ASTANA. KAZINFORM - Utebayev University-de ótken Ǵylym aptalyǵy aıasynda bilim alýshylar ózderiniń ǵylymı-zertteý jumystaryn tanystyrdy.Sol jobalardyń ishinde erekshe nazar aýdartqany – Autonomous Robotic Ground Universal System (ARGUS) ınnovatsııalyq ázirlemesi boldy.
QR Ǵylym jáne joǵary bilim mınıstrligi baspasóz qyzmetiniń habarlaýynsha, atalǵan robot adam bara almaıtyn aımaqtarda jumys isteı alady, qaýipti jaǵdaılarda tıimdi sheshim usynyp, aýyr júkterdi tasymaldaýǵa arnalǵan.
ARGUS – ıntellektýaldy modýldik platforma. Jobanyń avtory – magıstrant Almaz Qadyrbek, ǵylymı jetekshisi – professor Aqmaral Qonarbaeva. Bul joba zamanaýı ınjenerlik sheshimder men joǵary tehnologııalardy biriktiretin keshendi júıe bolyp otyr.
Aıta ketý qajet, joba ıdeıasy avtordyń stýdenttik kezeńinde qalyptasqan. Bakalavrıatta bilim alý barysynda dýaldy oqytý baǵdarlamasy aıasynda óndiriste jumys isteı júrip, aýyr elektr qozǵaltqyshtaryn tasymaldaýdaǵy qıyndyqtardy baıqaǵan. Osy tájirıbe óndiristik máseleni sheshýge baǵyttalǵan robottyq platformany ázirleýge negiz boldy.
Robottyń negizgi ereksheligi – 8×8 dońǵalaq formýlasy. Bul sheshim qurylǵynyń kúrdeli relefte, qumdy jáne tasty jerlerde erkin qozǵalýyna múmkindik beredi. Árbir dońǵalaq jeke elektr jetegimen jabdyqtalǵan, bul robottyń manevrlik qabiletin arttyryp, platformanyń turaqtylyǵyn qamtamasyz etedi.
- Óndiristik nysandarda, ásirese munaı-gaz salasynda adam ómirine qaýip tóndiretin aımaqtar jetkilikti. ARGUS dál osyndaı jaǵdaılarda adamdy almastyra alady. Qashyqtan basqarylatyn júıe tsehtar men qoımalar arasynda jabdyqtardy tasymaldap, logıstıkalyq shyǵyndardy azaıtýǵa yqpal etedi. Bolashaqta robot tolyq avtonomdy navıgatsııa júıesimen jabdyqtalyp, derbes sheshim qabyldaý deńgeıine jetedi dep kútiledi, - delingen habarlamada.
Sondaı-aq onda jobanyń áleýeti tek ýnıversıtet deńgeıinde ǵana emes, respýblıkalyq deńgeıde de joǵary baǵalanǵany aıtylǵan.
«Samuryq-Qazyna» AQ qoldaýymen ótken «Óndiristik robototehnıkanyń jańa dáýiri» baıqaýynda ARGUS elimizdiń túkpir-túkpirinen usynylǵan 252 joba arasynan úzdik jobalardyń qataryna endi.
Qazirgi ýaqytta robottyń demonstratsııalyq prototıpin qurastyrý jumystary júrgizilip jatyr. Onyń mehanıkalyq qurylymy daıyn, al jetek modýlderin biriktirý kezeńi júzege asyrylyp jatyr. Jas ǵalymnyń aldaǵy josparlary aýqymdy. Almaz Qadyrbek bolashaqta ushqyshsyz ushý apparatyn ázirleýdi josparlap otyr. Osy baǵyt boıynsha alǵashqy ǵylymı-zertteý jáne jobalaý jumystary bastalǵan.
Osyǵan deıin Qazaqstanda 10 myń jumysshyǵa 7 robottan keletini, mınıstr muny tómen kórsetkish dep ataǵany týraly jazdyq.
