Qazaqstandyq stıpendııa ıegerlerine Sasseks ýnıversıtetinde jeńildik beriledi
ASTANA. KAZINFORM — «Halyqaralyq baǵdarlamalar ortalyǵy» AQ men Ulybrıtanııadaǵy Sasseks ýnıversıteti ózara túsinistik týraly memorandýmǵa qol qoıdy. Kelisim «Bolashaq» jáne «Ǵylymı taǵylymdamalar» baǵdarlamalarynyń stıpendııa ıegerlerine ýnıversıtette oqý kezinde oqý aqysyna jeńildik alýǵa múmkindik beredi.
Qujatqa 15 qyrkúıekte «Halyqaralyq baǵdarlamalar ortalyǵy» AQ Basqarma tóraǵasy Abaı Rahmet pen Sasseks ýnıversıtetiniń halyqaralyq máseleler jónindegi prorektor orynbasary Simon Thompson qol qoıdy.
Memorandým bilim berý jáne ǵylym salalaryndaǵy yntymaqtastyqty damytýǵa, sondaı-aq qazaqstandyq stıpendııa ıegerleri úshin jańa múmkindikter ashýǵa baǵyttalǵan. Kelisimge sáıkes, «Bolashaq» jáne «Ǵylymı taǵylymdamalar» baǵdarlamalarynyń stıpendııa ıegerleri Sasseks ýnıversıtetinde oqý aqysyna jeńildik alý múmkindigine ıe bolady.
Іs-shara barysynda Abaı Rahmet Ortalyq qyzmetiniń negizgi baǵyttaryna toqtalyp, «Bolashaq» jáne «Ǵylymı taǵylymdamalar» baǵdarlamalaryndaǵy ózekti ózgerister men jańashyldyqtardy tanystyrdy. Sondaı-aq memorandýmdy iske asyrýdyń maqsattary men negizgi baǵyttaryn atap ótti.
— Sasseks ýnıversıtetimen memorandýmǵa qol qoıý qazaqstandyq ǵalymdardyń bilim alýy men ǵylymı taǵylymdamadan ótýine jańa múmkindikter beredi. Ásirese damý salasyndaǵy zertteýler, saıasattaný, áleýmettaný, halyqaralyq qatynastar jáne basqa da áleýmettik-gýmanıtarlyq baǵyttar boıynsha yntymaqtastyqtyń áleýeti zor, — dedi Abaı Rahmet.
Onyń aıtýynsha, Sasseks ýnıversıtetiniń seriktestik ornatýǵa nıeti joǵary baǵalanady. Birlesken jumys qazaqstandyq mamandardyń básekege qabilettiligin arttyrýǵa jáne elimizdiń adamı kapıtalyn damytýǵa yqpal etedi.
Kezdesý barysynda Simon Thompson Sasseks ýnıversıtetiniń akademııalyq kórsetkishteri, bilim berý baǵdarlamalary men ǵylymı áleýeti týraly aqparat berdi.
Sasseks ýnıversıteti — Ulybrıtanııadaǵy jetekshi memlekettik zertteý ýnıversıtetteriniń biri. Ol «Bolashaq» jáne «Ǵylymı taǵylymdamalar» baǵdarlamalaryna qatysýǵa usynylatyn sheteldik uıymdar tizimine engizilgen. Ýnıversıtet álemniń 150-den astam elinen stýdentter men qyzmetkerlerdi tartyp, halyqaralyq yntymaqtastyqty belsendi damytyp keledi.
Eske salaıyq, buǵan deıin «Bolashaq» stıpendııasy men ǵylymı taǵylymdama ıegerleriniń esimi belgili bolǵanyn habarlaǵanbyz.
