Qazaqstandyq startapshy áıelder Aurora Tech Award 2024 baıqaýynyń short-lıstine endi
ASTANA. KAZINFORM – Halyqaralyq Aurora Tech Award 2024 baıqaýynyń short-lısti jarııalandy. Oǵan 102 elden 649 ótinim túsken. Sońǵy kezeńge iriktelgen 20 startapshy áıelder arasynda qazaqstandyq Nadejda Anpılogova, Aıdana Aıtýarova jáne Ásem Tájıeva bar.

Jeńimpazdardyń esimi 8 naýryz – Halyqaralyq áıelder kúni belgili bolady. Onda IT-kásipkerler, ótken jylǵy Aurora Tech syılyǵynyń jeńimpazdary jáne álemniń áıgili salalyq sarapshylary qazylyq etedi. Júldegerler sáıkesinshe $30,000, $20,000 jáne $10,000 aqshalaı syılyqtarǵa ıe bolady.
Nadejda Anpılogova jasaǵan Your Accessible Guide – múmkindigi shekteýli jáne erekshe qajettilikteri bar adamdar úshin qoljetimdi týrızmdi ilgeriletýge arnalǵan ınklıýzıvti tsıfrlyq ónimder ekojúıesi.
«Biz kartaǵa erekshe qajettilikteri bar týrısterge qoljetimdi baǵyttar men núktelerdi túsirip, zerttelmegen kontınentti taýyp jatqan sııaqtymyz. Al, teńdik pen ınklıýzııa ıdeıalaryn qoldaıtyn mundaı jarystar kúsh-jiger beredi. Biz Aurora Tech Award syılyǵynyń short-lıstine engenimizge óte qýanyshtymyz jáne marapat sarapshylarynyń kómegimen jobany damytýǵa mańyzdy qadam jasaı alamyz dep úmittenemiz. Baıqaý alańynan adamdar biz týraly neǵurlym kóp estise, soǵurlym týrızmdegi ınklıýzııa men qoljetimdilik taqyrybymen kóbirek tanysady, saıahatty barlyǵyna qoljetimdi ete alady», - deıdi N. Anpılogova.
Taǵy bir qazaqstandyq Aıdana Aıtýarovanyń Porte Tech jobasy – RFID kartalaryn, avtoturaq pýltterin, qaǵaz ruqsattaryn jáne magnıtterdi bir qoldanbaǵa biriktirý arqyly shyǵyndar men ýaqytty azaıtýǵa kómektesetin, ESG-ge baǵdarlanǵan, avtomattandyrylǵan «esik kilti» bar veb-qosymsha.
«Short-paraqqa engenime tańǵaldym. Árıne, júldeger atanyp, qomaqty aqshany utyp alǵym keledi, Biraq maǵan birinshi kezekte óz bıznesimizdiń mánin kórsetý mańyzdy. Kóbinese baıqaýlarǵa qatysqanda áleýmettik joba bolǵandyqtan júldeli orynǵa ıe bolmaıtynbyz. Porte-de biz ádetterdi ózgertemiz, protsesterdi tıimdi etip jasaımyz jáne plastıkalyq karta túrindegi qajetsiz shyǵyndardy alyp tastaımyz», - dep túsindirdi A. Aıtýarova.
Al Ásem Tajıeva Ozim platformasynyń erekshe qajettilikteri bar balalardyń ata-analaryna arnalǵan áleýmettik joba ekenin atap ótti.
«Men sońǵy sátke deıin Aurora Tech Award syılyǵyna qatysý-qatyspaý týraly naqty sheshimdi qabyldaı almaı júrdim. Bul úlken halyqaralyq baıqaý bolǵandyqtan, oǵan qatysý qıyn bolady dep oıladym. Ótinishimdi 15 mınýtta tirkegenimde tańǵaldym. Short-lıstke engenimizdi jáne fınalıster qandaı artyqshylyqtarǵa ıe ekenin bilgende, qatty qýandym. Óıtkeni dál qazir bizge ınvestıtsııany qarjylandyrý, bıznes-modelder jáne masshtabtaý salasyndaǵy tálimgerler qajet. Baıqaýda jeńiske jetip, aqshalaı syılyq utyp alamyn dep úmittenemin, ony erekshe qajettilikteri bar balalardyń ata-analaryna arnalǵan Ozim platformasy mobıldi qosymshasyn ázirleýge jumsaımyn», - dedi ol.
Jeńimpazdar 2024 jyldyń 8 naýryzynda auroratechaward.com saıtynda jarııalanady. Úzdik 20 úmitker arasynda Brazılııa, Kolýmbııa, Taıvan, Ispanııa, Argentına, BAÁ ,Meksıka, Ózbekstan, Nıderlandy, Gonkong, Indonezııa, Nıgerııadaǵy startapshy áıelder bar.