Qazaqstandyq startap AQSh-tyń iri kompanııasymen uzaq merzimdi kelisim jasady
ASTANA. KAZINFORM – Qazaqstandyqtar negizin qalaǵan Nace.AI startapy AQSh-taǵy Big4 kompanııalarynyń birimen uzaq merzimdi kelisimshartqa qol qoıdy.
Kompanııa bul kelisim Nace.AI ázirlemeleriniń halyqaralyq naryqta suranysqa ıe ekenin kórsetetinin málimdedi.
– Biz olarmen jumysqa kiristik jáne NDA qujatyna qol qoıdyq. Biraq bul kompanııanyń Big4 quramyna kiretinin ári kelisimsharttyń uzaq merzimge jasalǵanyn aıta alamyz. Startapymyzdy álemniń ozyq kompanııalary tańdaǵanyna qýanyshtymyz. Biz strategııalyq tásil men irgeli ǵylymǵa basymdyq beremiz, – dedi Nace.AI kompanııasynyń basshysy Baqytjan Dos.
Nace.AI joǵary dáldikpen jumys isteıtin jáne naqty bıznes-nátıje beretin mamandandyrylǵan tildik modelder ázirleıdi.
Kompanııanyń negizgi ónimi – NAVI júıesi qarjylyq aýdıtti avtomattandyrýǵa arnalǵan.
Júıe úlken kólemdegi derekterdi taldap, negizgi kórsetkishter men yqtımal táýekelderdi anyqtaıdy.
Kompanııa málimetinshe, olardyń sheshimderi klıentterdiń tapsyrmalardy oryndaý ýaqytyn shamamen 20 esege deıin qysqartýǵa múmkindik beredi.
Startap irgeli ǵylym men ınjenerlik tájirıbeni biriktirýge basymdyq beredi.
Kompanııa jalpy maqsattaǵy sheshimderge qaraǵanda naqty qoldanbaly mindetterde joǵary dáldik kórsetetin yqsham mamandandyrylǵan modelder ázirleýge baǵyttalǵanyn atap ótti.
Buǵan deıin Nace.AI halyqaralyq ınvestorlardan 21,5 mln AQSh dollary kóleminde ınvestıtsııa tartqan.
Qazirgi ýaqytta startap aýqymyn keńeıtip, jańa mamandardy jumysqa qabyldap jatyr.
Kompanııa Ortalyq Azııadan shyqqan daryndy mamandar men uzaq merzimdi jobalarǵa qyzyǵýshylyq tanytatyn kásibı kadrlardy izdeıtinin málimdedi.
Aıta keteıik, Jasandy ıntellekt mınıstrligi Aitu messendjerine qatysty pikir bildirdi.
