Qazaqstandyq sportshylar XII Dúnıejúzilik oıyndaryn tarıhı nátıjemen aıaqtady
ASTANA. KAZINFORM – Chendý qalasynda (Qytaı) 7-17 tamyz aralyǵynda ótken XII Dúnıejúzilik oıyndarda Qazaqstan quramasy óz tarıhyndaǵy eń úzdik nátıjege qol jetkizdi, dep habarlaıdy Kazinform tilshisi.
Sportty damytý dırektsııasynyń málimdeýinshe, tórt jylda bir ret uıymdastyrylatyn Dúnıejúzilik oıyndarda elimizden 31 sportshy 8 sport túrinen baq synady.
Álemdik dodada otandastarymyz 10 medal (2 altyn, 5 kúmis, 3 qola) enshilep, júlde sany men sapasy jaǵynan rekord ornatty.
Altyn medal ıegerleri:
• Jánibek Ábý-Bákir – djıý-djıtsý
• Ulbosyn Ádilova – sambo
Kúmis júldegerler:
• Móldir Jańbyrbaı – WKF karate
• Nursultan Dúısenqulov – djıý-djıtsý
• Maratbek Rahmetollın – sambo
• Sambodan erler quramasy – Tóleýhan Nıethan, Baqytjan Dúısembekov, Maratbek Rahmetollın, Táńirbergen Tergeýbekov
• Sambodan áıelder quramasy – Arýjan Kenesary, Ulbosyn Ádilova, Quralaı Qabraıqyzy, Marjan Bızaq, Aınur Aqjigitova
Qola medal ıegerleri:
• Aslan Qanatbek – djıý-djıtsý
• Seıilhan Bolatbek – djıý-djıtsý
• Rıshat Haıbýllın – sporttyq quzǵa órmeleý
Erekshe oqıǵalar:
• Jaýyngerlik sambo 1993 jyldan keıin alǵash ret oıyndar baǵdarlamasyna engizilip, qazaqstandyqtar bir altyn, úsh kúmis jeńip aldy.
• Djıý-djıtsý boıynsha Qazaqstan quramasy tarıhı jetistikke jetti: buryn bar bolǵany eki qola medali bolsa, bıyl bir altyn, bir kúmis, eki qola enshiledi.
• Sporttyq quzǵa órmeleý boıynsha el tarıhyndaǵy alǵashqy qola medaldi Rıshat Haıbýllın jeńip aldy.
• Bul oıyndarda birneshe sportshy alǵash ret halyqaralyq deńgeıde júldeger atandy.
Qazaqstan quramasynyń Dúnıejúzilik oıyndardaǵy buǵan deıingi kórsetkishteri:
1. 1993 jyly Nıderland elinde 1 altyn, 1 kúmis, 1 qola aldy.
2. 1997 jyly Fınlıandııada 1 altyn, 1 qolaǵa qol jetkizdi.
3. 2001 jyly Japonııada 1 altyn enshiledi.
4. 2005 jyly Germanııada 1 kúmis, 1 qola aldy.
5. 2009 jyly Taıvan elinde 1 altyn, 1 qolaǵa qanaǵat bildirdi.
6. 2013 jyly Kolýmbııada júlde ala almady.
7. 2017 jyly Polshada 1 altyn, 2 qola aldy.
8. 2022 jyly – Amerıka Qurama Shtattarynda 1 altyn, 2 kúmis, 1 qolamen jarysty aıaqtady.
Aıta keteıik, XII Dúnıejúzilik oıyndarǵa álemniń 114 elinen 3 962 sportshy qatysyp, 34 sport túri boıynsha 256 medal jıyntyǵy sarapqa salyndy.
Dúnıejúzilik oıyndar — Halyqaralyq Dúnıejúzilik oıyndar qaýymdastyǵy (IWGA) uıymdastyratyn, Olımpıada baǵdarlamasyna enbeıtin sport túrlerinen ótetin halyqaralyq kópsalaly jarys. Bul oıyndar ár 4 jyl saıyn ótkiziledi.
Eske salsaq, buǵan deıin Ulbosyn Ádilova XII Dúnıejúzilik oıyndarynda top jarǵanyn jazǵan edik.