Qazaqstandyq sportshylarǵa Olımpıadaǵa daıyndyq úshin 2500 dollardan tólendi
ASTANA. KAZINFORM — Árbir sportshyǵa 2500 AQSh dollary kóleminde qarajat berildi. Bul týraly UOK habarlady.
2028 jyly AQSh-tyń Los-Andjeles qalasynda ótetin Olımpıada oıyndaryna daıyndyq aıasynda Halyqaralyq Olımpıadalyq komıtetiniń (HOK) jeke stıpendııalyq baǵdarlamasyna engen qazaqstandyq sportshylarǵa alǵashqy qarjylyq tólem jasaldy.
Árbir sportshyǵa 2500 AQSh dollary kóleminde qarajat berildi.
Atalǵan baǵdarlama Olımpıadaǵa irikteý kezeńi men daıyndyq barysynda sportshylarǵa qarjylaı qoldaý kórsetýge baǵyttalǵan. Qazaqstandyq atletterdiń stıpendııa ıegerleri qataryna qosylýyna Qazaqstan Ulttyq Olımpıadalyq komıteti bastamashy boldy. UOK ulttyq federatsııalarmen jáne HOK-pen birlesip jumys júrgizip, ótinim berý protsesin tolyq úılestirdi.
— Stıpendııa 2028 jylǵy Olımpıada oıyndarynyń baǵdarlamasyna engen jeke sport túrlerinde baq synaıtyn sportshylarǵa beriledi. Іrikteý barysynda úmitkerlerdiń nátıjeleri, Olımpıadaǵa joldama alýǵa múmkindigi jáne joǵary nátıje kórsetý áleýeti basty nazarǵa alyndy. Sonymen qatar dopıngke qatysty ereje buzýshylyqtardyń bolmaýy jáne Olımpıadalyq hartııa talaptaryna qaıshy keletin jaıttardyń joqtyǵy mańyzdy talaptardyń biri boldy, — delingen UOK habarlamasynda.
Bólingen qarajat oqý-jattyǵý jıyndaryn ótkizýge, jeke daıyndyqqa, jattyqtyrýshylar men mamandardyń eńbekaqysyn tóleýge, medıtsınalyq jáne ǵylymı qoldaýǵa, saqtandyrýǵa, sondaı-aq, turý men tamaqtaný shyǵyndaryn óteýge jumsalýy múmkin. Qarjynyń jumsalýy belgilengen tártipke saı turaqty túrde esepke alynady.
2028 jylǵy Olımpıadaǵa daıyndyq kezeńi bastaldy. Árbir daıyndyq satysynyń mańyzy zor. Bul stıpendııa sportshylarǵa jattyǵý josparyn júıeli quryp, irikteý jarystaryna tyńǵylyqty ázirlenýge kómektesedi. Nátıjesinde olar kózdegen kórsetkishterine qol jetkizýge múmkindik alady, — dep málimdedi Qazaqstan UOK.
Qazaqstan atynan stıpendııa ıegerleri atanǵan sportshylar:
— Aıda Ábikeeva (boks)
— Saǵyndyq Toǵambaı (boks)
— Ǵusman Qyrǵyzbaev (dzıýdo)
— Ábıba Ábýjaqynova (dzıýdo)
— Mılad Karımı (sporttyq gımnastıka)
— Rýslan Kýrbanov (semserlesý)
— Ishar Kýrbaev (grek-rım kúresi)
— Rızabek Aıtmuhan (erkin kúres)
— Zeınep Baıanova (áıelder kúresi)
— Marııa Brovkova (eskek esý — baıdarka/kanoe)
— Aleksandra Le (nysana kózdeý)
— Islam Sátpaev (nysana kózdeý)
— Ámir Maımuratov (sporttyq quzǵa órmeleý)
— Batyrhan Tóleýǵalı (taekvondo)
— Alan Qurmanǵalıev (ústel tennısi)
— Elızaveta Matveeva (jeńil atletıka)
— Ásem Orynbaı (stend atý)
— Sergeı Petrovıch (aýyr atletıka)
— Araı Nurlybekova (aýyr atletıka)
— Danıl Mýsabaev (batýttaǵy gımnastıka)
HOK-tyń bul stıpendııalyq baǵdarlamasy sportshylarǵa qosymsha múmkindik berip, olardyń Olımpıadaǵa irikteýden sátti ótip, joǵary nátıjege jetýine jaǵdaı jasaýǵa baǵyttalǵan.
Aıta ketelik 2030 jylǵy qysqy Olımpıada qaıda ótetinin jazǵan edik.