Qazaqstandyq sportshylardyń ótken aptadaǵy jarqyn jeńisi
ASTANA. KAZINFORM – Ótken apta qazaq sportshylary úshin jetistikke toly boldy. QR Týrızm jáne sport mınıstrligi sportshylarymyzdyń qandaı kórsetkishterge qol jetkizgenine qysqasha sholý jasady.
Dzıýdo: Portýgalııada uıymdastyrylǵan dzıýdodan álemdik Gran-prı týrnırinde Qazaqstan quramasy bir júlde jeńip aldy. Qyzdar arasyndaǵy 48 kg salmaq dárejesinde beldesken otandasymyz Ábıba Ábýjaqynova týrnırdiń qola júldegeri atandy. Úshinshi oryn úshin ótken kezdesýde jerlesimiz túrkııalyq Sıla Ersinnen basym tústi.
Velosport: Velosporttan Túrkııada ótken GP ANTALYA AIRPORT CITY básekesinde ulttyq quramanyń múshesi Rýslan Alıev qola júldege ıe boldy. Onyń ýaqyt kórsetkishi – 03:26:05.
Ústel tennısi: Ústel tennısinen sport sheberi Janerke Qoshqymbaeva Dohada ótken (Qatar) WTT Youth Contender týrnırinde top jardy. Ol 19 jasqa deıingi sportshylar arasyndaǵy básekede tuǵyrdyń bıik satysyna kóterildi.
Stend atý: Stend atýdan Kaırde (Mysyr) ótip jatqan Álem kýbogy kezeńiniń «Trap» baǵdarlamasynda otandasymyz Marııa Dmıtrıenko top jardy. Altyn júlde úshin ótken tartysty saıysta 35 jastaǵy otandasymyz Tokıo Olımpıadasynyń chempıony, 2 dúrkin álem chempıony Fatıma Galvez jáne Tokıo Olımpıadasynyń 2 márte júldegeri Alessandra Perıllıden ozdy.
Nysana kózdeý: Mysyr astanasynda nysana kózdeýden ótip jatqan reıtıngtik Əlem kýbogynda jerlesterimiz eki júldege ıe boldy. Pnevmatıkalyq tapanshadan 10 metrden oq atýda Valerıı Rahımjan men Irına ıÝnýsmetova juby qola júldeger atansa, dál osy baǵdarlamanyń jekeleı saıysynda Irına ıÝnýsmetova úshinshi orynǵa taban tiregen bolatyn. Stend atý jáne nysana kózdeýden Álem kýbogynda 66 memleketten jınalǵan 678 surmergen 10 júlde jıyntyǵyn sarapqa salyp jatyr. Báseke 1 aqpanǵa deıin jalǵasady.
