Qazaqstandyq sportshylardyń bıylǵy rekordy – 912 medal

ASTANA. KAZINFORM – Qazaqstandyq sportshylar 2025 jyldyń alǵashqy segiz aıynda halyqaralyq arenalarda 912 medal jeńip aldy. Onyń ishinde 351-i – altyn, 270-i – kúmis, 291-i – qola, dep habarlaıdy Týrızm jáne sport mınıstrligi.

Bul tarıhı kórsetkish memleket tarapynan sportqa júıeli qoldaý, jattyqtyrýshylar quramynyń eńbegi, sport federatsııalarynyń úılesimdi jumysy nátıjesinde múmkin boldy. Sonymen qatar ulttyq quramalarǵa sheteldik mamandardyń kelýi men jańa ádistemelerdiń engizilýi de mańyzdy ról atqarǵan.

Mınıstrliktiń málimetinshe, bıylǵy maýsymda birqatar tarıhı jeńister tirkeldi:

• short-trekte qysqy Azııa oıyndaryndaǵy alǵashqy altyn;

• frıstaıl-mogýlda álem chempıonatynyń qola medali;

• frıstaıl-akrobatıkada (sınhrondy sekirý) qysqy Azııa oıyndaryndaǵy alǵashqy altyn;

• semserlesýde álem chempıonatyndaǵy alǵashqy tarıhı medal;

• kórkem gımnastıkada jasóspirimder arasyndaǵy álem chempıonatyndaǵy alǵashqy altyn;

• dzıýdoda áıelder arasyndaǵy álem chempıonatyndaǵy alǵashqy fınal jáne kúmis medal;

• boksta World Boxing uıymy aıasyndaǵy alǵashqy álem chempıonatynda jalpykomandalyq esepte 1-oryn;

• mánerlep syrǵanaýda álem chempıonatyndaǵy kúmis medal;

• para bıatlonda Álem kýbogynyń qorytyndysy boıynsha Hrýstal globýs.

Komandalyq sport túrlerinde de eleýli jetistikter bar. «Qaırat» fýtbol klýby alǵash ret óz tarıhynda Chempıondar lıgasynyń negizgi kezeńine ótti.

Sondaı-aq fýtzaldan «Qaırat» komandasy ÝEFA Chempıondar lıgasynyń kúmis júldegeri atandy.

Segiz aıdaǵy bul kórsetkishter qazaqstandyq sporttyń qarqyndy damyp kele jatqanyn aıqyn dáleldep otyr.

Alda Mılan-2026 qysqy Olımpııa oıyndary qarsańynda sportshylardy jaýapty maýsym kútip tur.

Aıta keteıik, Qazaqstan kýbogynda úzdik semserlesýshiler anyqtaldy.