Qazaqstandyq sportshylardyń Azııa para oıyndaryna daıyndyǵy qalaı

Sanaýly kúnnen keıin otandyq para sporshylarymyz ІV jazǵy Azııa para oıyndarynda el namysyn qorǵaıdy, dep habarlaıdy Kazinform. 

«ІV jazǵy Azııa para oıyndary 22-28 qazan aralyǵynda Qytaıdyń Hanchjoý qalasynda ótedi. Jalpy sportshylar 22 sport túrinen 564 júldege talasady. Al bizdiń parasportshylar 14 sport túrinen 131 otandasymyz baq synaıdy. Sport túrlerine kelsek, para dzıýdo, para paýerlıftıng, para júzý, para kanoe, para jeńil atletıka, para taekvondo, para oq atý, para sadaq atý, otyryp oınaý voleıboly, para ústel tennısi, para velosport, para akademııalyq esý, shahmat, jáne bochcha», - dedi Týrızm jáne sport vıtse-mınıstri Sársen Quranbek Ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, Azııa para oıyndary keshendi jarys bolǵandyqtan jaýapkershilik joǵary. Óıtkeni Azııa para oıyndarynda reıtıng úshin upaılar jınalady. Sondaı-aq kelesi jyldyń maýsym aıyna deıin ótetin halyqaralyq básekelerde Parıj paralımpıadasynyń joldamasy sarapqa salynady.

«Osy kúnge deıin ulttyq qurama Azııa para oıyndaryna daıyndyqty pysyqtaý maqsatynda 14 sport túri boıynsha 40-tan astam oqý-jattyǵý jıynyn ótkizdi. Jıyn barysynda sportshylar qajet vıtamındermen qamtamasyz etilip, bapkerlermen qosa arnaıy kıim-keshekter men qural-jabdyqpen qamtyldy», - deıdi ol.