Qazaqstandyq sportshylar XII Dúnıejúzilik oıyndarda óner kórsetedi
ASTANA. KAZINFORM - 2025 jylǵy 7-17 tamyz aralyǵynda Qytaıdyń Chendý qalasynda XII Dúnıejúzilik oıyndar ótedi. Bul baıraqy básekede qazaqstandyq sportshylar óner kórsetedi.
Bul týraly QazAqparat tilshisine «Sporttyq damytý dırektsııasy» RMKQ dırektorynyń orynbasary Eset Qalıdollauly aıtyp berdi.
- Bul álemdik doda sońǵy ret AQSh-ta ótken bolatyn. Dúnıejúzilik oıyndary Olımpıada baǵdarlamasyna kirmeıtin sport túrlerin basym baǵyt etip ótkizedi. Qazaq eli bul saıysqa dástúrli túrde qatysyp, tabysty óner kórsetip keledi. Bıylǵy dodaǵa bizdiń elden 30 dan astam sportshy barady dep josparlap otyrmyz. Bul sportshylar buǵan deıingi sporttyq jarystarda nátıjeli óner kórsetip, lıtsenzııa utyp alǵandar. Qazaqstan ulttyq qurama komandalary djıý-djıtsý, karate, mýaıtaı, sambo, sporttyq akrobatıka, sporttyq quzǵa órmeleý, sadaq atý jáne ýshý sekildi sport túrleri boıynsha medaldar úshin básekege túsedi, - deıdi Eset Qalıdollauly.
Dúnıejúzilik oıyndar — Halyqaralyq Dúnıejúzilik oıyndar qaýymdastyǵy (IWGA) uıymdastyratyn, Olımpıada baǵdarlamasyna enbeıtin sport túrlerinen ótetin halyqaralyq kópsalaly jarys. Bul oıyndar ár 4 jyl saıyn ótkiziledi.
Bıyl bul baıraqty básekege álemniń ár elinen 5000 ge jýyq sportshy jáne 75 ke jýyq komanda qatysady dep josparlanǵan.
Atalǵan jarysta sportshylar 34 sport túri boıynsha 253-ten astam medal úshin jarysady.
HІІ Dúnıejúzilik oıyndar osy jyldyń tamyz aıynda Qytaıdyń Chendý qalasynda ótedi.