Qazaqstandyq sportshylar Reseı jáne Belarýstegi halyqaralyq týrnırde joǵary nátıje kórsetti
ASTANA. KAZINFORM - Qazaqstannyń «Prestige Horse Club» atty kásibı at sporty klýbynyń ókilderi Raısa jáne Oleg Sokolenko Reseı Federatsııasy men Belarýs Respýblıkasynda ótken halyqaralyq jarystarda elimizdiń namysyn abyroımen qorǵap, joǵary jetistikterge qol jetkizdi.
2025 jylǵy 2 - 6 shilde aralyǵynda Mınsk qalasynda ótken Dostastyq kýbogy aıasynda Raısa Sokolenko Qazaqstan – Ózbekstan quramasynyń sapynda óner kórsetip, 145 sm bıiktiktegi komandalyq marshrýtta 1-orynǵa ıe boldy. Sportshy «Ýran» atty atymen eki kezeńdi de aıyp upaıynsyz eńserip, sheberlik pen senimdiliktiń úlgisin kórsetti.
Odan keıingi mańyzdy doda 17 - 27 shilde aralyǵynda Máskeý oblysynda ótken Eýrazııalyq oıyndar boldy. Toǵyz memleketten kelgen myqty sportshylar arasyndaǵy 25 jasqa deıingi jas sanatynda Raısa Sokolenko jeke esep boıynsha chempıon atanyp, óz daıyndyǵynyń joǵary deńgeıi men turaqty nátıjeliligin taǵy bir márte dáleldedi.
Sonymen qatar jazǵy maýsym barysynda Oleg Sokolenko turaqty túrde joǵary nátıje kórsetip, óz sheberligin aıqyn tanytty:
· 130 sm bıiktiktegi marshrýtta — 1-oryn (CluGold atty atymen);
· 125 sm marshrýtta — 3-oryn (Selly Blue);
· 135 sm marshrýtta — 5-oryn (Selly Blue);
· Maxima Park kezeńinde 120, 125 jáne 135 sm bıiktiktegi birneshe marshrýtta jeńiske jetti (CluGold, Cinderella jáne Selly Blue atty attarmen).
Atalǵan nátıje «Prestige Horse Club» klýbynda júrgiziletin kásibı jáne júıeli daıyndyq jumystarynyń jemisi. Klýbtyń sportshylary Qazaqstannyń atyn halyqaralyq deńgeıde tanytyp, elimizdiń bedelin arttyrýǵa súbeli úles qosyp keledi.
Aıta keteıik, álemde 57 mıllıonnan astam jylqy bar. Onyń shamamen 5 mıllıony Qazaqstanda eken. Soǵan qaramastan elimizde at sporty kenje qalyp keledi.