Qazaqstandyq sportshylar para oq atýdan álem kýbogynda 4 medal enshiledi
ASTANA. KAZINFORM — Serbııanyń Novı-Sad qalasynda tirek-qımyl apparaty zaqymdanǵan sportshylar arasynda para oq atýdan álem kýbogynda Qazaqstan komandasy 1 altyn, 1 kúmis jáne 2 qola medal jeńip aldy.
Jekeleı synda Aleksandr Pashalıdı pnevmatıkalyq vıntovkada 10 metr qashyqtyqta R1 dıstsıplınasynda 236,2 upaı jınap, Álem kýbogynyń jeńimpazy atandy.
Oǵan qosa, erler arasynda pnevmatıkalyq vıntovkada (10 metr) komandalyq jarysta R1 dıstsıplınasynda Erkin Ǵabbasov, Ardaq Otarbaev pen Arsen Muratov 1847.5 upaı jınap, kúmis júldege ıe boldy. Áıelder arasynda R2 dıstsıplınada Áıgerim Tólegenova, Anna Dovgelevıch pen Ulbolsyn Qusaınova 1820.7 upaı sanymen qola medal jeńip aldy.
Pnevmatıkalyq tapanshadan R6 dıstsıplınasynda komandalyq mıkste synǵa túsken Aleksandr Pashalıdı men Aısulý Muqashbekova 398.3 upaı kórsetkishimen qola medal jeńip aldy.
Aıta keteıik, para oq atýdan álem kýbogy 24-29 shilde aralyǵynda ótti. Jarysqa 51 elden 300-ge jýyq sportshy qatysty. Atalmysh básekede el namysyn 17 sportshy 61 dıstsıplınada qorǵady.
Eske salaıyq, buǵan deıin Oralda ótip jatqan el chempıonatynda klassıka jáne kompaýnd básekeleri boıynsha eresek, U29 jáne U21 sanaty boıynsha fınalıster belgili bolǵan edi.
