Qazaqstandyq sportshylar Olımpıadadaǵy jarysyn tolyq aıaqtady
ASTANA. KAZINFORM — Frantsııa astanasy Parıj qalasynda ótip jatqan 2024 jylǵy Olımpıadalyq oıyndarda qazaqstandyq sportshylar jarysty tolyq aıaqtady.
Erkin kúreste Álishek Erǵalı (97 keli) jubanysh beldesýinde búgin synǵa tústi. Bul básekede qazaqstandyq balýan ırandyq Amır Alı Azarpırge ese jiberdi. Saldarynan ol qola júldege qol jetkize alǵan joq. Osylaısha el quramasynan sońǵy bolyp jarysty aıaqtady.
Aıta ketsek, Parıj Olımpıadasynda qazaqstandyqtar 25 sport túrinen 92 joldamaǵa ıe bolǵan edi.
El quramasy 1 altyn, 3 kúmis, 3 qola medalmen ázirshe 41orynǵa turaqtap tur.
Parıj Olımpıadasy búgin máresine jetedi. Saltanatty jabylý rásimi Astana ýaqytymen 23:00-ge josparlanǵan.
Oıyndardyń jabylýyn tikeleı efırden 23:15-te JIBEK JOLY, Qazaqstan, Qazsport jáne Habar telearnalarynda kórýge bolady.
