Qazaqstandyq sportshylar konkýrdan FEI Álem kýbogy kezeńderinde tabysty óner kórsetti
ASTANA. KAZINFORM - Ózbekstan men Qyrǵyzstanda konkýrdan FEI Eýrazııa lıgasynyń Álem kýbogy kezeńderi aıaqtaldy.
Halyqaralyq jarystar qorytyndysy boıynsha Qazaqstan quramasy sapynda óner kórsetken «Prestige Horse Club» sportshylary 18 medal jeńip aldy: 7 altyn, 5 kúmis jáne 6 qola.
Álem kýbogynyń alǵashqy eki kezeńi Ózbekstanda, úshinshi kezeńi Bishkekte ótti.
Qazaqstandyq shabandozdar halyqaralyq baǵyttarda, sonyń ishinde jarystyń eń bedeldi ári basty syny sanalatyn Grand Prix baǵytynda turaqty túrde úzdikter qatarynan kórindi.
Maýsymdaǵy basty nátıjelerdiń biri – Oleg Sokolenkonyń Cinderella sáıgúligimen 155 sm bıiktiktegi kedergiler qoıylǵan Grand Prix marshrýtynda qola júlde alýy boldy. Bul synda negizgi báseke Reseıdiń konkýr mektebiniń ókilderi arasynda órbise, Oleg Sokolenko kóshbasshylar qataryndaǵy jalǵyz qazaqstandyq sportshy atandy.
Grand Prix deńgeıindegi baǵyttar 2026 jyly Aahende ótetin FEI álem chempıonatyna, 2027 jylǵy Eýropa chempıonatyna jáne 2027 jylǵy Álem kýbogynyń fınalyna joldama beretin negizgi irikteý jarystary sanalady. Qazirgi tańda Oleg Sokolenko men Cinderella juby Grand Prix marshrýttarynyń birin aıyp upaıynsyz aıaqtap, mınımaldy biliktilik normatıvin (MER) oryndaý jolyndaǵy kúresti jalǵastyryp jatyr.
Álem kýbogy kezeńderinde joǵary nátıje kórsetkenderdiń qatarynda Uran Nad Wigrami, Chevalier jáne Clue Gold attarymen synǵa túsken Raısa Sokolenko da bar. Sonymen qatar klýbtyń ózge de sportshylary halyqaralyq baǵyttarda júldegerler qatarynan turaqty kórindi.
Maýsymnyń kelesi mańyzdy kezeńi – 29-31 mamyr aralyǵynda Astanada ótetin halyqaralyq jarystar bolmaq. Týrnır Halyqaralyq at sporty federatsııasy (FEI) men Eýrazııalyq at sporty qaýymdastyǵynyń (AEF) qoldaýymen uıymdastyrylady.
Osyǵan deıin konkýrdan Qazaqstan quramasy Tashkenttegi týrnırde 3 altyn medal jeńip alǵany týraly jazdyq.
