Qazaqstandyq sportshylar qysqy Azııa oıyndarynda bir-birine qalaı jankúıer boldy
ASTANA. KAZINFORM – Qytaıdyń Harbın qalasynda IX qysqy Azııa oıyndary óz máresine jetti, dep habarlaıdy olympic.kz.
Qazaqstan quramasy bıatlon, kerlıng, skı-alpınızm, hokkeı, short-trek, konkımen júgirý, shańǵy jarysy, frıstaıl-akrobatıka, taý shańǵysy sporty jáne mánerlep syrǵanaý sııaqty sport túrlerinen synǵa tústi.
Eń alǵash bolyp hokkeı jáne kerlıng boıynsha jarystar bastaldy. Erler arasyndaǵy hokkeı týrnıriniń alǵashqy matchtary 3 aqpanda ótti. Qazaqstan erler quramasyn qoldaý úshin alǵashqylardyń biri bolyp áıelder hokkeı quramasynyń músheleri keldi.
Matchtar kezinde hokkeı arenasyndaǵy jankúıerler qatarynan short-trekshilerdi, kerlıngten áıelder quramasyn jáne ózge de sportshylardy kórgen edik.
Kerlıngten Qazaqstan áıelder quramasynyń kapıtany Angelına Ebaýerdiń aıtýynsha, olar short-trek komandasyna jankúıer bolyp, olardyń jeńisine qýandy.
Al konkımen júgirý jarysynda 3000 metr qashyqtyqta óner kórsetken Krıstına Shýmekovany qoldaýǵa onyń ápkeleri Inessa men Alına Shýmekovalar keldi.
Qazaqstandyq sportshylardyń ózara qoldaýyn erekshe kórsetken elementterdiń biri – quramanyń arnaıy eksklıýzıvti hýdı men svıtshottary boldy. Olarǵa balalardyń jyly tilekteri men sýretteri beınelengen.
Bul jarqyn kıim Harbındegi oıyndarda qazaqstandyq sportshylardyń aıryqsha belgisine aınaldy.
«Biz otandyq Arqymaq brendimen birlesip, sportshylarymyzǵa balalar ázirlegen tilekter men sýretter beınelengen svıtshottar men hýdıler toptamasyn shyǵardyq. Bul dástúrge aınalǵan ıgi is boldy. Bul joly árbir jankúıer olımpıadalyq otbasynyń bir bóligi bolyp, Arqymaq dúkenderinen lımıttelgen toptamany satyp ala alady», – dep málimdedi Qazaqstan UOK ókilderi.
Eske salaıyq, IX qysqy Azııa oıyndary 2025 jylǵy 7-14 aqpan aralyǵynda Harbınde ótti. Qazaqstan quramasy jalpy esepte 20 medal jeńip aldy: 4 altyn, 9 kúmis jáne 7 qola.
Osyǵan deıin hokkeıden Qazaqstan áıelder quramasy Azııa oıyndarynyń kúmis júldesine ıe bolǵany týraly jazǵan edik.