Qazaqstandyq sportshylar Islam yntymaqtastyǵy oıyndarynda 56 medal jeńip aldy

ASTANA. KAZINFORM - Saýd Arabııasynyń Er-Rııad VI Islam yntymaqtastyǵy oıyndary óz máresine jetti. Jarysqa 57 eldiń sportshylary qatysty.

QR Týrızm jáne sport mınıstrliginiń habarlaýynsha, el quramasy jeńil atletıka, kıbersport, semserlesý, gandbol, djıý-djıtsý, dzıýdo, karate, júzý, ústel tennısi, taekvondo, aýyr atletıka, erkin kúres, grek-rım kúresi, áıelder kúresi, ýshý jáne mýaı-taı sekildi 16 sport túrinen baq synady.

Otandastarymyz Islam yntymaqtastyǵy oıyndarynda barlyǵy 56 medal jeńip aldy. Onyń ishinde 15-i altyn, 20-y kúmis 21-i qola.

Islam yntymaqtastyǵy oıyndarynda birqatar sport túrinen otandastarymyz alǵash ret altyn aldy. Atap aıtsaq, dzıýdo (Arýna Jangeldına), ústel tennısi (Kırıll Gerasımenko men erler komandasy), mýaı-taı (Turar Dúısehan), semserlesý (erler komandasy) jáne djıý-djıtsýda (úsh altyn) otandastarymyz úzdik shyqty.

Al ústel tennısinen Kırıll Gerasımenko fınalda Parıj Olımpıadasynyń 1/8 fınalynda ese jibergen Omar Muhammed Asardan basym tústi. Erkin kúresten álem chempıony Rızabek Aıtmuqan da Parıj Olımpıadasynyń chempıony, álem chempıony Ahmed Tajýdınovty (Bahreın) oısyrata jeńdi.

Sondaı-aq otandastarymyz gandbol, djıý-djıtsý, mýaı-taı, ýshý jáne semserlesýde alǵash ret medal jeńip aldy.

Aıta ketsek, qazaqstandyq djıý-djıtsý sheberi Mansur Habıbýlla Er-Rııadta (Saýd Arabııasy) ótip jatqan Islam yntymaqtastyǵy oıyndarynda qola medal jeńip aldy.