Qazaqstandyq sportshylar Eýrazııalyq lıgadaǵy álem kýbogynan medalmen oraldy
ASTANA. KAZINFORM – Qazaqstandyq sportshylar konkýr boıynsha Eýrazııalyq lıgadaǵy álem kýbogy kezeńinde júldeli oryndarǵa ıe boldy. Bul týraly At sporty federatsııasynyń baspasóz qyzmeti habarlady.
17–20 sáýir aralyǵynda Tashkentte (Ózbekstan) konkýrdan Eýrazııalyq lıgadaǵy álem kýbogynyń kezeńi ótti. Elimizdiń namysyn qorǵaǵan 6 sportshynyń ekeýi júldeli oryndarǵa ıe boldy.
Ksenııa Batalova Lady Di tulparymen (160 sm bıiktiktegi 6-shy marshrýtta) ekinshi orynda kelip, Gran-prı júldegeri atandy. Nurıla Týrysbekova Nagano B atty tulparmen (130 sm bıiktiktegi 5-shi marshrýtta) qola medalǵa ıe boldy.
Jarysqa Qazaqstan, Ózbekstan, Qyrǵyzstan elderiniń 43 myqty shabandozdary qatysty. Bul Eýrazııalyq lıganyń kúntizbesine engizilgen jáne Halyqaralyq maýsymnyń mańyzdy kezeńi bolyp tabylady. Qazaqstandyq sportshylardyń bul jarystardaǵy nátıjesi halyqaralyq arenada básekege qabiletti ekendigin taǵy da dáleldeıdi.
Aıta ketelik «Ulttyq jáne at sporty túrleri ortalyǵynyń» jańa dırektory taǵaıyndalǵan edi.