Qazaqstandyq sportshylar dzıýdodan Sýrdlımpıada oıyndaryn cátti bastady

ASTANA. KAZINFORM — Qazaqstandyq dzıýdoshylar Sýrdlımpıada oıyndarynyń alǵashqy kúninde eki altyn jáne eki qola medal jeńip aldy. Bul týraly QR Ulttyq Sýrdlımpıada komıteti málim etti.

XXV jazǵy Sýrdlımpıada oıyndarynyń alǵashqy jarys kúninde Qazaqstannyń dzıýdodan ulttyq qurama komandasy jarysty tamasha bastap, eki altyn jáne eki qola medalǵa qol jetkizdi.

66 kelige deıingi salmaq dárejesinde Hamze Ǵulama fınaldyq beldesýde aljırlik sportshy Býhıdel Abderrahmandy ıpponmen taza jeńip, Sýrdlımpıada chempıony atandy.

73 kelige deıingi salmaqta el qorjynyna ekinshi altyndy Shadııar Qýandyq saldy. Ol fınalda koreıalyq dzıýdoshy Hvang Hendy ıpponmen utyp, joǵary sheberlik pen beldesý sońyna deıingi barynsha jınaqylyqtyń jarqyn úlgisin kórsetti.

48 kelige deıingi salmaq dárejesinde synǵa túsken Aıym Jetpisbaeva jubanysh beldesýinde túrkııalyq sportshy Elıf Kıýchýkarslandy jeńip, Sýrdlımpıada oıyndarynyń qola júldegeri atandy.

60 kelige deıingi salmaqta Altynbek Kákitaev jubanysh beldesýinde nıderlandyq sportshy Albert Vesterhofty aıqyn basymdyqpen jeńip, Sýrdlımpıada oıyndarynyń qola júldesine ıe boldy.

Qazaqstan Respýblıkasynyń Ulttyq Sýrdlımpıada komıtetiniń tóraǵasy Serik Sápıevtiń aıtýynsha, jarystyń osyndaı sátti bastalýy búkil quramanyń rýhyn kóterip, Qazaqstannyń jalpykomandalyq medal kestesindegi pozıtsııasyn nyǵaıta túsedi. Alǵashqy kúnniń qorytyndysy boıynsha qazaqstandyq dzıýdoshylardyń enshisinde tórt júlde bar: eki altyn jáne eki qola medal. Sportshylar óz ónerin ózge salmaq dárejelerinde jáne basqa sport túrlerinde jalǵastyrmaq.

Aıta keteıik, Tokıoda XXV jazǵy Sýrdlımpıada oıyndary bastaldy.