Qazaqstandyq sportshy taekvondodan álem chempıonatynda tarıhı júlde jeńip aldy
ASTANA.KAZINFORM - Qazaqstandyq taekvondoshy Nodıra Ahmedova Qytaıdyń Ýsı qalasynda ótip jatqan taekvondodan álem chempıonatynda qola júlde jeńip aldy.
49 kelige deıingi salmaq dárejesinde synǵa túsken otandasymyz jarysty jartylaı fınaldan aıaqtap, úzdik úshtikten kórindi. Jartylaı fınalda ol qytaılyq Taıpeı sportshysy ıÝ ıÝn Lıýge ese jiberdi.
Nodıra Ahmedova álem chempıonatynda barlyǵy 4 kezdesý ótkizip, Brazılııa, Kanada jáne Taıland sportshylarynan basym tústi.
Aıta keterligi, bul – Nodıra Ahmedovanyń kásibı sporttaǵy eń úlken jetistigi jáne Qazaqstan áıelder taekvondosyna álem chempıonatynan 18 jyldan keıin oralǵan tarıhı medal. Áıelder quramasy osyǵan deıin sońǵy ret 2007 jyly Qytaıdyń Beıjiń qalasynda ótken álem chempıonatynda qola júldege qol jetkizgen.
Taekvondodan Qazaqstan quramasynyń bas bapkeri Esbol Sultanov qazaqstandyqtardy jáne elimizdiń taekvondo quramasyn taıhı jeńisimen quttyqtady.
– Búgin Nodıra araǵa alty jyl salyp álem chempıonatynda qola júlde enshiledi. Bul – óte qýanyshty jáne tarıhı jeńis,- dedi Sultanov.
Sonymen qatar Sultanov el quramasynyń álem chempıonatyndaǵy alǵashqy eki kúnin qorytyndylady.
- Samırhon Ababakırov, Beıbarys Qablan jáne Marııa Sevostıanova sharshy alańǵa shyǵyp, óte keremet óner kórsetti. Beıbarys Qablan álem chempıonyn qapy qaldyrdy. Samırhon sońyna deıin aıqasyp, ókinishke qaraı shırek fınalǵa óte almaı qaldy. Onyń qarsylasy óte azýly, álem jáne Olımpıada oıyndarynyń júldegeri. Samırhon bolashaǵy bar sportshy, alda taǵy biraz jumys atqarýy kerek, - dedi ol.
Sóz sońynda bas bapker alda áli bes jarys kúni bar ekenin eske salyp, jaqsy nátıje kútetinin jetkizdi.
Osyǵan deıin Esbol Sultanov Kazinform tilshisine bergen suhbatynda elimizdegi taekvondo sportynyń damýy jaıynda sóz qozǵap, elimizge tarıhı medal syılaýdy basty maqsat etip otyrǵanyn aıtqan bolatyn.