Qazaqstandyq sportshy Azııa Olımpıadalyq keńesiniń Sportshylar komıssııasyna kandıdat atandy
ASTANA. KAZINFORM — Azııa Olımpıadalyq keńesi (AOK) 2026 jyly Aıchı-Nagoıa qalalarynda ótetin XX jazǵy Azııa oıyndary aıasynda uıymnyń Sportshylar komıssııasyna saılanatyn úmitkerlerdiń tizimin bekitti.
Barlyǵy tórt jańa múshe saılanady: Ortalyq, Shyǵys jáne Batys Azııadan bir-bir ókil, sondaı-aq, Ońtústik-Shyǵys Azııadan bir áıel sportshy. Ortalyq Azııa aımaǵynan jalǵyz orynǵa Ámir Maımuratov (Qazaqstan, sporttyq quzǵa órmeleý), Arıan Salımı (Iran, taekvondo) jáne Djasýrbek Jaısynov (Ózbekstan, taekvondo) úmitker.
Ámir Maımuratov 2024 jyly Parıjde (Frantsııa) ótken Olımpıada oıyndaryna qatysqan. «Jyldamdyq» saıysynda qazaqstandyq sportshy besinshi oryndy ıelendi. Sondaı-aq onyń qorjynynda Álem kýbogy kezeńderi men Azııa chempıonatynda jeńip alǵan júldeler bar.
Aıta keteıik, AOK talaptaryna sáıkes, barlyq kandıdat qazirgi kezde sportpen belsendi túrde aınalysatyn sportshylar nemese sońǵy eki jazǵy ne qysqy Azııa oıyndarynyń qatysýshylary bolýy tıis. Olar ókildik etetin sport túri jazǵy Olımpıada oıyndarynyń baǵdarlamasyna engizilgen bolýy qajet. Sonymen qatar úmitkerler Komıssııa jumysyn atqarý úshin aǵylshyn tilin erkin meńgerýi kerek.
Daýys berý 2026 jylǵy Azııa oıyndary kezinde, 20 qyrkúıek pen 2 qazan aralyǵynda ótedi. Oıyndardyń árbir qatysýshysy óz óńirindegi kandıdattardyń birine bir ret daýys bere alady. Daýys berý aıaqtalǵan soń AOK Sportshylar komıssııasynyń tórt jańa múshesin jarııalaıdy.
AOK Sportshylar komıssııasy sportshylardyń múddesin uıym qurylymdarynda qorǵap, olardyń sheshim qabyldaý úderisine qatysýyna múmkindik beredi. Komıssııa músheleri sportshylar men AOK basshylyǵy arasyndaǵy baılanysty qamtamasyz etip, jarystardy uıymdastyrý, dopıngke qarsy saıasat, medıtsınalyq qyzmet kórsetý jáne logıstıka máseleleri boıynsha sportshylardyń ustanymyn bildiredi. Komıssııanyń aımaqtyq qaǵıdat boıynsha jasaqtalýy Azııanyń bes óńirindegi sportshylardyń múddesin eskerýge múmkindik beredi.
