Qazaqstandyq skrıpkashy halyqaralyq baıqaýda ekinshi oryn ıelendi
BERLIN. KAZINFORM – Germanııada Guadanini Foundation 2-shi Shtýtgart halyqaralyq skrıpkashylar baıqaýy ótti. Mýzykalyq bedeldi báıgede Qazaqstan atynan skrıpkashy Rýslan Talas óner kórsetip, júldeli ekinshi orynǵa ıe boldy.
Baıqaýda birinshi oryndy Ońtústik Koreıa skrıpkashysy Anna Im ıelense, úshinshi oryndy amerıkalyq Metıý Hakkaraınen jeńip aldy.
Aıta ketý kerek, 25 jastaǵy otandasymyz birneshe ret iri halyqaralyq mýzykalyq baıqaýlardyń laýreaty jáne dıplomanty atanǵan. 2022 jyly ol WorldVision-da jeńiske jetti. Rýslan Latyn Amerıkasy men AQSh elderinde tanymal. Al Eýropada ol «qazaqtyń Paganınıi» degen laqap atqa ıe.
Óner ıesi Astanadaǵy ulttyq mýzyka akademııasyna 7 jasynda qabyldanǵan. Akademııadaǵy oqýyn bitirgen soń, Máskeýdegi Ortalyq mýzyka mektebinde bilimin jalǵastyrdy, al 2021 jyldan bastap Lozan mýzyka Akademııasynyń (Shveıtsarııa) magıstranty atanyp, aty ańyzǵa aınalǵan skrıpkashy Djanın ıAnsen synybynda oqıdy.
