Qazaqstandyq Silk Way Star telejobasy alǵash ret Qytaı ortalyq telearnasynan kórsetildi
ASTANA. KAZINFORM – Silk Way Star halyqaralyq vokaldyq baıqaýynyń grand-fınaly 30 qańtarda Qytaı ortalyq telearnasy qurylymyna kiretin CCTV-15 mýzykalyq arnasynan kórsetildi.
Silk Way Star grand-fınalynyń Qytaıdyń eń iri medıa holdınginde kórsetilýi qazaqstandyq televıdenıe ındýstrııasy úshin mańyzdy oqıǵa boldy. 1,1 mlrd-tan astam áleýetti aýdıtorııasy bar platformadaǵy habar taratý sensatsııalyq oqıǵaǵa jaqyn jáne elder arasyndaǵy gýmanıtarlyq jáne mádenı yntymaqtastyqty damytýdaǵy mańyzdy qadam bolyp otyr.
Qytaılyq kórermen 12 el: Qazaqstan, Mońǵolııa, Ázerbaıjan, Armenııa, Grýzııa, Malaızııa, Qytaı, Qyrǵyzstan, Tájikstan, Túrikmenstan, Ózbekstan jáne Ońtústik Koreıadan kelgen oryndaýshylardyń basyn qosqan aýqymdy halyqaralyq jobanyń sharyqtaý shegine kýá boldy.
Silk Way Star – Azııadaǵy osyndaı formattaǵy alǵashqy halyqaralyq vokaldyq baıqaý. Joba ártúrli mýzykalyq dástúrdi, tildi jáne oryndaýshylyq mektepti biriktirgen biregeı mádenı platformaǵa aınaldy. Baıqaý prodakshn, jandy daýys, aýqymdy qoıylymdar jáne zamanaýı telearnalyq óndiristiń joǵary deńgeıin kórsetti.
QR Prezıdenti Teleradıokesheni basshysy Raýshan Qajybaeva 2025 jylǵy maýsymda QR Prezıdenti Qasym-Jomart Toqaev pen QHR Tóraǵasy Sı Tszınpınniń kezdesýinde 12 eldiń qatysýymen Halyqaralyq mýzykalyq jobany iske asyrý týraly kelisimge qol qoıylǵanyn atap ótti. Medıaholdıng dırektory memlekettik keńesshi Erlan Qarınge joba ıdeıasy avtorlyǵy jáne senim bildirgeni úshin alǵysyn bildirdi.
Esterińizge sala keteıik, Qazaqstan Prezıdentiniń atynan ІІ dárejeli «Dostyq» ordeni, sondaı-aq Memleket basshysynyń Alǵys haty Silk Way Star bedeldi halyqaralyq baıqaýynyń qatysýshylary men uıymdastyrýshylaryna tabystaldy.
Grand-fınaldyń CCTV-15 arnasynda kórsetilýi jobanyń joǵary halyqaralyq mártebesin jáne onyń Qazaqstannan tys jerlerde suranysqa ıe ekenin kórsetedi. Bul jaı ǵana telearnalyq kórsetilim emes, sonymen qatar qazaqstandyq medıa kontenttiń áleýetin jahandyq deńgeıde kórsetetin strategııalyq mádenı kópir.
2025 jyly baıqaýdyń jeńimpazy Mońǵolııadan kelgen Mıshel Djozef boldy. Silk Way Star-dyń kelesi maýsymy Qytaıda ótedi. Osylaısha joba geografııalyq turǵyda keńeıip, halyqaralyq seriktestiktiń nyǵaıýyn sımvolıkalyq túrde jalǵastyrady.