Qazaqstandyq short-trekshiler men mánerlep syrǵanaýshylar AOK, ISU oqý-jattyǵý jıyndaryna qatysady
ASTANA. KAZINFORM – Qazaqstandyq sportshylar men bapkerler Azııa Olımpıadalyq keńesi (AOK) men Halyqaralyq konkıshiler odaǵy (ISU) uıymdastyratyn short-trek pen mánerlep syrǵanaý boıynsha oqý-jattyǵý jıyndaryna qatysady. Bul týraly QR Ulttyq olımpıadalyq komıtet habarlady.
Birlesken oqý-jattyǵý jıyndary Qytaıdyń Harbın qalasynda Azııadaǵy qysqy sport túrlerin damytý jáne jas sportshylardy qoldaý baǵdarlamasy aıasynda ótedi. Jattyǵýlar aldaǵy jyldardaǵy iri halyqaralyq jarystarǵa, sonyń ishinde 2028 jyly Italııada ótetin qysqy jasóspirimder Olımpıadasyna, 2029 jylǵy Almatydaǵy qysqy Azııa oıyndaryna jáne 2030 jyly Frantsııa Alpilerinde ótetin qysqy Olımpıada oıyndaryna daıyndyqqa baǵyttalǵan.
Short-trek boıynsha oqý-jattyǵý jıyny 19-27 shilde aralyǵynda ótedi. Qazaqstan atynan bapker Ǵalym Hasanov pen sportshylar ıAn Kýtovoı jáne Beknur Ýrazbekov qatysady.
Al 27 shilde men 4 tamyz aralyǵynda mánerlep syrǵanaý boıynsha oqý-jattyǵý jıyny uıymdastyrylady. Bul jıynda elimizdiń namysyn bapker Aleksandra Brejneva, sondaı-aq, mánerlep syrǵanaýshylar Karına Sheına men Adelıa Týleshova qorǵaıdy.
Oqý-jattyǵý jıyndary barysynda qatysýshylar ISU mamandarynyń jetekshiligimen tehnıkalyq sheberlikti jetildirýge baǵyttalǵan qarqyndy daıyndyqtan ótedi.
Aıta keteıik, oqý-jattyǵý jıyndaryna qatysýshylardyń kandıdatýralaryn ulttyq sport federatsııalary usynyp, uıymdastyrýshylardyń talaptaryna sáıkes Qazaqstan Ulttyq Olımpıadalyq komıteti arqyly resmı túrde joldady.
Astana 2027 jyly mánerlep syrǵanaýdan Tórt qurlyq chempıonatyn qabyldaıtynyn jazǵan edik.
