Qazaqstandyq sharýalar sý berý kelisimsharttaryn elektrondy túrde rásimdeı bastady
ASTANA. KAZINFORM – Qazaqstanda bıyl alǵash ret sýarmaly sý berý jónindegi kelisimsharttardy rásimdeý úderisi tsıfrlyq formatqa kóshirilip, sýarý maýsymy bastalǵaly sharýalarmen 29 myńnan astam elektrondy kelisim jasaldy, dep habarlaıdy QR Sý resýrstary jáne ırrıgatsııa mınıstrligi.
Jańa bıllıng júıesin mınıstrlikke qarasty «Sý resýrstarynyń aqparattyq-taldaý ortalyǵy» KEAQ ázirlegen. Onyń kómegimen aýyl sharýashylyǵy taýaryn óndirýshiler «Qazsýshar» RMK-men sýarmaly sý berý jónindegi kelisimsharttardy elektrondy túrde rásimdeı alady.
Sharýalardyń aıtýynsha, jańa júıe qujat rásimdeý men sý berý qyzmetiniń aqysyn tóleýdi jeńildetip, sý resýrstaryn bólýdiń ashyqtyǵyn arttyrǵan.
– Buǵan deıin qaǵaz toltyryp, sýdyń aqysyn mekemege aparyp beretin edik. Qazir elektrondy formatqa aýysyp, qujattyń bári túgeldendi. Bul ózgeris sharýaǵa yńǵaıly boldy. Sebebi qujatty bir ret ótkizseń jetkilikti. Bıyl sýdan qınalmadyq. Biz kanaldyń eń sońǵy bóliginde ornalasqanbyz. Soǵan qaramastan sý ýaqytyly jetkizilip turdy. Buryn sý mundaı kólemde kelmeıtin. Bıyl qalaǵan kólemdegi sýymyzdy aldyq, – dedi sharýa Qýanysh Danııarov.
Taǵy bir sharýa Erkin ıAkýpov buǵan deıin sýǵa aqy tóleý úshin «Qazsýsharǵa» arnaıy barýǵa týra kelgenin aıtady.
– Qazir elektrondy formatqa kóshtik. Burynǵydaı baryp júrmeı, onlaın tólem jasaımyz. Bul bizge jeńil boldy. Sý da ýaqytyly berildi. Eki ret maqta men qaýyn alqaptaryn sýardyq, – dedi ol.
Mınıstrlik málimetinshe, bıllıng júıesi sýdy paıdalanýdyń ashyqtyǵyn arttyryp, ony zańsyz paıdalaný táýekelderin barynsha azaıtýǵa múmkindik bergen. Sonymen qatar tutynýshylardyń «Qazsýshar» RMK aldyndaǵy bereshegin azaıtýǵa jáne ońtústik óńirlerde sýdy paıdalaný lımıtteriniń saqtalýyn qamtamasyz etýge yqpal etken.
Aldaǵy ýaqytta bıllıng júıesin odan ári jetildirý josparlanyp otyr. Sý resýrstary jáne ırrıgatsııa mınıstrligi ony kanaldar arqyly sý berý qyzmetin kórsetetin basqa da mekemelerde kelisimsharttardy rásimdeý úshin engizýdi kózdeıdi.
Aıta keteıik, MÁS-ke kezek kútý jeńildep, 4 myńnan astam adam elektrondy júıeni paıdalandy.
