Qazaqstandyq sharýalar egin sýarýǵa jaramdy jerasty sýynyń 0,7%-yn ǵana paıdalanady

ASTANA. KAZINFORM — Sý resýrstary jáne ırrıgatsııa mınıstrligi Jerasty sýlary departamentiniń dırektory Jaıyq Erikuly aýyl sharýashylyǵyna jaramdy jerasty sýynyń basym bóligi paıdalanylmaı jatqanyn aıtty. 

— Jer asty sýlarynyń jalpy paıdalaný qorynan (táýligine 43,2 mln m3), sýarýǵa jaramdy sýdyń kólemi táýligine 19,6 mln tekshe metr ekeni barlandy. Bul jylyna 7,7 mlrd tekshe metr degen sóz. Sonymen qatar, sýarýǵa jaramdy jerasty sýyn naqty paıdalaný tek 0,7% ǵana (táýligine 0,15 mıllıon m3). Bul paıdalanylmaǵan úlken áleýetti kórsetedi, — dedi ol ortalyq kommýnıkatsııalar qyzmetinde ótken baspasóz máslıhatynda.

Mınıstrliktiń deregine súıensek, qazaqstandyqtar tutynatyn sýdyń 65%-y aýyl sharýashylyǵyna jumsalady.

Buǵan deıin Aqtóbede jerasty sýyn ruqsatsyz paıdalanyp otyrǵan sharýalarǵa aıyppul salyndy.