Qazaqstandyq shahmatshylar jasóspirimder arasyndaǵy chempıonatta bes altyn medal jeńip aldy
ASTANA. KAZINFORM — Taıland astanasy Bangkokta shahmattan 27-shi jasóspirimder arasyndaǵy Azııa chempıonaty aıaqtaldy.
Baǵdarlamanyń úsh túri — klassıka, rapıd jáne blıts boıynsha jas qazaqstandyqtar 11 medal jeńip aldy, onyń beseýi altyn. Mılana Fılıppova (G10) jáne Marııa Holıavko (G14) — klassıkada, Ámirjan Ánetov (O10) — rapıdte, Álisher Ábdisattar (O14) jáne Ásııa Asylhan (G16) — blıtste Azııa-2025 chempıondary atandy.
2025 jylǵy 21–29 qarasha aralyǵynda Taıland astanasy Bangkokta 33 el men aýmaqtan kelgen shamamen 700 qatysýshynyń basyn qosqan shahmattan 27-shi jasóspirimder arasyndaǵy Azııa chempıonaty ótti.
— Alǵashqy kúni 15+5 ýaqyt baqylaýymen 7 týrlyq «shveıtsar» júıesinde ótken rapıdte júldeler sarapqa salyndy (O10 sanatynda Azııa chempıony Ámirjan Ánetov atandy, qola medal onyń qurdasy Alıhan Nazarbekke buıyrdy). Osydan keıin jas shahmatshylar baǵdarlamanyń ekinshi bóligi — 90+30 ýaqyt baqylaýymen ótetin 9 týrlyq klassıkaǵa kóshti. Munda qazaqstandyqtar 5 medal jeńip aldy. Azııa chempıondary — Mılana Fılıppova (G10) jáne Marııa Holıavko (G14), al qola medal ıegerleri — Rızat Ulan (O10), Ádııa Jeńis (G12) jáne ıAsmına Alemanova (G16), — delingen habarlamada.
Klassıkanyń sońǵy týry aıaqtala salysymen, baǵdarlamanyń úshinshi túri — 3+2 ýaqyt baqylaýymen ótetin blıtstiń 9 týry bastaldy. Bireýler úshin bul óz ámbebaptyǵyn taǵy bir márte dáleldeý múmkindigi bolsa, endi bireý úshin aldyńǵy kezeńderdegi sátsizdikterdi túzetýge arnalǵan sońǵy múmkindik boldy.
Qazaqstandyq jeńimpazdar men júldegerler barlyǵy osy múmkindikti tolyq paıdalandy. Azııa chempıondary atanǵandar — astanalyq Álisher Ábdisattar (O14) jáne Túrkistan oblysynan Ásııa Asylhan (G16), kúmis medaldy pavlodarlyq Asman Baıantas (O18) jeńip aldy, al qola medal astanalyq Álimjan Jaýynbaıǵa (O12) buıyrdy.
Aıta ketelik Memleket basshysy álem birinshilikterinde top jarǵan jas shahmatshylarmen kezdesken edi.