Qazaqstandyq shabandozdar Nıderlandydaǵy halyqaralyq týrnırde ekinshi qola júldeni oljalady
ASTANA. KAZINFORM - Qazaqstan ulttyq quramasynyń múshesi Oleg Sokolenko Nıderlandyda ótip jatqan Ermelo CSI2* konkýrdan halyqaralyq týrnırinde qola júlde ıelendi.
Nátıjeniń joǵary deńgeıin jarysqa qatysýshylardyń quramy da aıǵaqtaıdy. Oleg Sokolenko birqatar tanymal halyqaralyq shabandozdan joǵary nátıje kórsetti. Olardyń qatarynda Nıderland ókili Marc Houtzager 9-oryn, onyń otandasy Frank Schuttert 17-oryn, Germanııa ókili Laura Klaphake 22-oryn jáne amerıkalyq shabandoz Lucas Porter 26-oryn aldy.
Sondaı-aq Nıderlandynyń birneshe dúrkin Olımpıada júldegeri Maikel van der Vleuten de qazaqstandyq juptan keıin qaldy. Ol jarysqa eki atpen qatysty.
Nıderland konkýrynyń úzdik ókilderiniń biri Kim Emmen de qazaqstandyq juptan tómen nátıje kórsetti. Osy marshrýtta taǵy bir joǵary nátıjeni Raısa Sokolenko Uran Nad Wigrami atty atymen kórsetti. Qazaqstandyq jup ta qashyqtyqty aıyp upaısyz aıaqtap, 65,75 sekýnd nátıjesimen 85 qatysýshynyń arasynda segizinshi oryn aldy.
Osylaısha, bıiktigi 140 santımetr bolatyn CSI2* marshrýtynyń qorytyndysy boıynsha birden eki qazaqstandyq sporttyq jup úzdik segizdikke endi. Eki jup ta jarysty aıyp upaısyz aıaqtady.
Buǵan deıin, 19 tamyzda, Raısa Sokolenko Uran Nad Wigrami atty atymen bıiktigi 135 santımetr bolatyn Eventanations Prize CSI2* marshrýty boıynsha úshinshi oryn alǵan edi.
135 jáne 140 santımetrlik marshrýttardaǵy eki qola júlde, júldeli oryn ákelgen eki taza nátıje jáne 140 santımetrlik marshrýtta birden eki qazaqstandyq juptyń TOP-8 qataryna enýi – Qazaqstan quramasynyń Ermelodaǵy halyqaralyq týrnırdegi joǵary nátıjesi.
Týrnırdegi óner kórsetý Oleg jáne Raısa Sokolenkonyń Eýropadaǵy jarys baǵdarlamasy aıasynda ótip jatyr. Qazaqstandyq sportshylar Nıderland, Polsha jáne Germanııadaǵy halyqaralyq jarystarǵa júıeli túrde qatysyp, joǵary básekelestik jaǵdaıynda tájirıbe jınaqtap, birneshe sporttyq juppen jumys istep keledi.
Eýropalyq jarys baǵdarlamasy maýsymnyń basty dodasy – Japonııada ótetin XX Azııa oıyndaryna daıyndyqtyń bir bóligi. Onda Oleg jáne Raısa Sokolenko Qazaqstan quramasynyń sapynda el namysyn qorǵaıdy.
Jalpy, Ermelodaǵy týrnırge 17 elden 91 sportshy men 179 at qatysty.
Aıta keteıik, Bıbisara Asaýbaeva Cairns Cup 2026 týrnıriniń qola júldegeri atandy.
