Qazaqstandyq shabandoz Raısa Sokolenko Polshadaǵy halyqaralyq týrnırde kúmis júlde ıelendi
ASTANA. KAZINFORM — Qazaqstandyq shabandoz Raısa Sokolenko Polshada ótip jatqan Wierzbna Biały Las 2026 halyqaralyq týrnırinde CSI1* sanatyndaǵy marshrýtta kúmis júldege ıe boldy. Bul týraly QR At sporty federatsııasy málm etti.
27–30 tamyz aralyǵynda uıymdastyrylyp jatqan jarystyń búgingi baǵdarlamasynda qazaqstandyq shabandozdar bıiktigi 120 santımetr bolatyn CSI1* Dr Horse Cup marshrýtyna qatysty.
Jarys eki kezeńnen turdy. Birinshi kezeńde sportshylar 6 kedergiden jáne 7 sekirýden ótse, ekinshi kezeńde 5 kedergi men 6 sekirýdi oryndady. Eki kezeńdegi kedergilerdiń bıiktigi — 120 santımetr.
Raısa Sokolenko men Chevalier eki kezeńdi de aıyp upaıynsyz sátti aıaqtady. Sheshýshi ekinshi kezeńde qazaqstandyq jup 27,78 sekýnd nátıje kórsetip, 2-orynǵa ıe boldy. Bul — jeńimpaz kórsetkishinen nebári 0,09 sekýndqa kem.
Birinshi oryndy Germanııa ókili Silvio Weiss Stella B atymen 0 aıyp upaıy jáne 27,69 sekýnd nátıjesimen jeńip aldy. Úshinshi oryn Polshanyń sportshysy Anna Klosowska men Eflim jubyna buıyrdy. Olardyń nátıjesi — 28,32 sekýnd.
Raısa Sokolenko joǵary halyqaralyq básekelestik jaǵdaıynda birqatar tájirıbeli eýropalyq sportshydan ozyp shyqty. Atap aıtqanda, Germanııa ókili Simon Heineke 4-oryn, Matthias Lucas 5-oryn, al Avstrııa sportshysy Christian Rhomberg 7-oryn aldy.
Osy marshrýtta taǵy bir sportshymyz Oleg Sokolenko Shenanigan atymen 8-orynǵa turaqtady. Ol birinshi kezeńdi qatesiz aıaqtaǵanymen, ekinshi kezeńde 4 aıyp upaıyn aldy. Sonymen qatar Oleg Sokolenko 27,63 sekýnd ýaqyt kórsetip, ekinshi kezeńdegi barlyq qatysýshylar arasyndaǵy eń úzdik ýaqytty tirkedi.
Osylaısha, Qazaqstan ulttyq quramasynyń músheleri (Prestige Horse Club sportshylary) halyqaralyq marshrýttyń TOP-8 qataryna endi.
Polshadaǵy jarys Japonııada ótetin 2026 jylǵy XX Azııa oıyndaryna daıyndyq aıasyndaǵy mańyzdy halyqaralyq starttardyń biri bolyp otyr. Eýropadaǵy jarystar sporttyq juptarǵa joǵary deńgeıdegi halyqaralyq báseke jaǵdaıynda tájirıbe jınaqtap, marshrýttardy turaqty ári jyldam ótý sheberligin jetildirýge múmkindik beredi.
Aıta keteıik, aldaǵy Azııa oıyndarynda Qazaqstannyń namysyn qorǵaıtyn sportshylardyń sapynda Oleg Sokolenko, Raısa Sokolenko, Nurıla Turysbekova jáne Ksenııa Batalova bar. Olar konkýrdan synǵa túsedi.
