Qazaqstandyq shabandoz halyqaralyq týrnırde úzdik nátıje kórsetti
ASTANA. KAZINFORM – 3-6 shilde aralyǵynda Belarýs Respýblıkasynyń Ratomka qalasynda «Kýbok Sodrýjestva» konkýr boıynsha halyqaralyq jeke-komandalyq týrnır ótti.
Jarysqa Belarýs, Reseı, Ózbekstan elderinen, sondaı-aq Qazaqstan quramasynan sportshylar qatysty.
Týrnırdiń fınaldyq kúninde bıiktigi 145 sm bolatyn kedergilerdi eńserý boıynsha komandalyq jarystar ótti. Bul kezeńde sportshylar Úlken sheńberdiń júldeleri úshin baq synady.
Qazaqstandyq shabandoz Raısa Sokolenko Ýran esimdi tulparymen birinshi gıtti aıyp upaıynsyz aıaqtap, senimdi nátıje kórsetti.
Al ekinshi gıtte Qazaqstan men Ózbekstan shabandozdary birlesip, «Sodrýjestvo» komandasynyń quramynda óner kórsetip, Ózbekstan quramasynyń ókili Bekzod Kýrbanovpen birge joǵary sheberlik tanytyp, komandalyq esepte jeńiske jetti.
Mundaı halyqaralyq týrnırlerge qatysý qazaqstandyq shabandozdardyń kásibı sheberligin arttyrýyna, halyqaralyq sporttyq baılanystardy nyǵaıtýǵa jáne Qazaqstandaǵy at sportynyń tanymaldylyǵyn arttyrýǵa zor yqpal etedi.
Otandas sportshylar olımpıadalyq at sporty túrlerinen el namysyn abyroımen qorǵap, ulttyq jáne halyqaralyq arenalarda joǵary jetistikterge qol jetkizip keledi.
Aıta keteıik, Álıhan Áskerbaı Astanada aýyr atletıkadan Azııa chempıony atandy.