Qazaqstandyq serıaldar men fılmderdiń strımıngtik platformalarda kórsetkishi joǵary — medıaforým

ASTANA. KAZINFORM — Qazaqstandyq serıaldar men fılmder TMD, Eýropa jáne Azııa elderine eksporttalyp jatyr. Bul týraly Mádenıet jáne aqparat mınıstri Aıda Balaeva málim etti.

— Qazaqstandyq serıaldar men fılmder telearna men strımıngtik platformalarda joǵary kórsetkishterge ıe bolyp, TMD, Eýropa jáne Azııa elderine eksporttalyp jatyr. Osylaısha Qazaqstan «Kreatıvti taýarlar men qyzmetter» baǵyty boıynsha «Jahandyq ınnovatsııa ındeksi» reıtınginde 65-i orynǵa kóterildi, — dedi Aıda Balaeva elordada ótip jatqan ІІ Ortalyq Azııa medıaforýmynda.

Osy oraıda mınıstr otandyq beıhostıng jumysyn mysalǵa keltirdi. 

— «Sálem ınterteıment» (Salem entertainment) eksklıýzıvti beınekontenttiń otandyq fabrıkasy. Ol áleýmettik jelilerde jáne beınehostıngterde kontentti óndirý jáne taratý boıynsha óńirdegi eń iri medıakompanııa, — deıdi vedomstvo basshysy.

Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.

Buǵan deıin Mádenıet jáne aqparat mınıstri Ortalyq Azııa jýrnalıster akademııasy men kreatıvti hab qurýdy usyndy. Sonymen qatar Ortalyq Azııa elderiniń BAQ ókilderine arnalǵan ortaq syılyq taǵaıyndaý bastamasyn alǵa tartty. 

Sondaı-aq forým barysynda Qazaqstan men Ózbekstan aqparat salasynda áriptestikti nyǵaıtýǵa kelisti. 

Odan bólek, elimizde Ázerbaıjannyń «CBC TV» telearnasyn tirkeý múmkindigi qarastyryp jatyr.