Qazaqstandyq serıal Kannda Netflix jobasymen qatar turdy
ASTANA. KAZINFORM – Unico Play onlaın-kınoteatrynyń qazaqstandyq «TWO» atty jastarǵa arnalǵan serıalynyń treıleri álemdik kınonaryqtyń eń tanymal kórmesi MIPCOM-ǵa usynylǵan bolatyn. Qazaqstandyq ónim MIPCOM-nyń Fresh TV sektsııasynda Netflix, STUDIOCANAL jáne Beta Film sekildi ındýstrııanyń álemdik lıderlerdiń jobalarymen qatar kórsetildi. Bul osy sektsııada tanystyrýǵa iriktelip alynǵan qazaq kınosynyń tarıhyndaǵy birinshi týyndy.
MIPCOM — Frantsııanyń Kann qalasynda ótkiziletin halyqaralyq kontent naryǵynyń kórmesi. Kórmeniń ásirese Fresh TV sektsııasynyń bedeli óte joǵary. MIPCOM-dy The Wit halyqaralyq zertteý kompanııasy uıymdastyrady jáne kórmeniń maqsaty emerging talents (jańa talanttar) men kıno men medıa salasyndaǵy jańa ıdeıalardy izdeý.
«Jyl saıyn álemniń myń jarymnan astam jetekshi dıstrıbıýtor kompanııalary men prodıýserlik stýdııalary teleserıaldar men janrlyq kontenttiń úlken assortımentin osy kórmede tanystyrady. Fresh TV sektsııasynyń irikteýinen ótý kez kelgen kompanııa úshin óte úlken jetistik, sebebi bul jobany basqa elderge satý múmkindigin arttyrady. Kazaqstandyq jobaǵa osyndaı joǵary baǵanyń berilýi bizdi qatty qýantty. Bul «TWO» serıalynyń ıdeıasy, sıýjet jelisi jáne sapasy halyqaralyq trendter men sapa standarttaryna saı ekendigin kórsetedi», - dedi Unico Play kompanııasynyń bas prodıýseri Irına Sosnovaıa.
«TWO» serıalynyń sıýjeti boıynsha Margo esimdi joǵarǵy synyp oqýshysy jigitinen aıyrylmas úshin júkti ekendigi týraly ótirik aıtady, biraq keıin aldaýdyń zııany aldynan shyǵady.
«Bul serıal bizdiń jasóspirimder arasyndaǵy erte júktilik máselesine qatysty mańyzdy taqyrypty kóteredi. Joba áleýmettik jeliler dáýiri balanyń damýy men onyń áleýmettik ıntegratsııasyna qalaı áser etetindigi, «tsıfrlyq býllıng degen ne?» jáne vırtýaldy emes, shynaıy ómirdegi adamdar arasyndaǵy qarym-qatynastyń mańyzdylyǵy týraly oı tastaıdy. Joba bala men ata-ana arasyndaǵy qarym-qatynastyń qundylyǵyna erekshe nazar aýdarady», - dep Unico Play bas prodıýseri Beksýltan Qazybek pikirin bildirdi.
Atap óteıik, bul Uni-Q Group medıa holdıngine kiretin Unico Play onlaın-kınoteatrynyń álemdegi eń iri kıno naryqtarynyń biriniń kórmesine alǵash qatysýy.
