Qazaqstandyq Sergeı Emelıanov pen Bekarys Ramatýlla Olımpıadany aıaqtady

PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda baıdarkada eskek esýden 1000 metr qashyqtyqtaǵy shırek fınaldyq básekeler aıaqtaldy. 

Atalǵan synda jarysqa túsken otandasymyz Sergeı Emelıanov óz tobynda 3:59.68 ýaqyt nátıjesin kórsetip, 3-orynǵa turaqtady. Al jartylaı fınalǵa tek úzdik 2 sportshy ǵana joldama aldy.

Sonymen qatar kanoede eskek esýden 1000 metrde synǵa túsken Bekarys Ramatýlla da shırek fınalda 5-oryn alyp (ýaqyt kórsetkish — 3:45.77), jartylaı fınalǵa shyǵa almady.

Osylaısha eki sportshymyz da Olımpıada oıyndaryn júldesiz aıaqtady.

Búgin qazaqstandyq sportshylar sporttyń bes túrinen synǵa túsýde. Naqtyraq aıtsaq, baıdarka men kanoede esý, grek-rım kúresi, boks, taekvondo jáne trektegi velosporttan sportshylarymyz el namysyn qorǵaýda.

Qazir Qazaqstan qorjynynda Parıj Olımpıadasynyń 1 altyn, 1 kúmis, 3 qola medali bar.