Qazaqstandyq semserlesýshiler Parıj Olımpıadasynda 6-oryndy enshiledi

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda búgin semserlesýden Qazaqstan komandasy 6-shy orynǵa taban tiredi.

Besinshi orynǵa talasta qazaqstandyqtar Italııa quramasyna ese jiberip aldy.

Qos komanda arasyndaǵy kezdesý 45:36 esebimen, ıaǵnı qarsylastarmyzdyń basymdyǵymen aıaqtaldy. Osylaısha, otandastarymyz Parıj Olımpıadasyn 6-orynmen aıaqtady.

Bul synda Qazaqstan quramasy sapynan Rýslan Kýrbanov, Elmır Álimjanov, Vadım Sharlaımov jáne Erlik Sertaı baq synady.

Aıta ketsek, Parıj Olımpıadasyndaǵy komandalyq synnyń shırek fınalynda qazaqstandyqtar Vengrııaǵa jol bergen bolatyn.

Keıin 5-8 orynǵa talasý quqyǵyn alyp, aldymen Mysyrdy jeńdi. Alaıda, ıtalııalyqtardan utylyp qaldy.

Aıta keteıik, Qazaqstan komandasynyń namysyn Elmır Alımjanov, Rýslan Kýrbanov, Erlik Sertaı jáne Vadım Sharlaımov qorǵady. Búgin qazaqstandyq sportshylar sporttyń 8 túrinen - stendtik atý, akademııalyq esý, dzıýdo, jeńil atletıka, júzý, semserlesý, boks jáne batýt gımnastıkasynan baq synaýda.

Endi bir saǵattan keıin áıelder arasynda Karına Ibragımova shırek fınalǵa shyǵý úshin pýertorıkolyq Ashleın Motta Lozadamen bokstasady. Sonymen qatar, 3 tamyzǵa aýǵan túni, 00:20-da erler arasynda qazaqstandyq Sáken Bıbosynov pen ózbek Hasanboı Dýsmatov arasyndaǵy shırek fınal jekpe-jegi ótedi.