Qazaqstandyq semserlesýshiler álem kýbogy kezeńinde júldege talasady
ASTANA. KAZINFORM – Búgin elordada semserlesýden álem kýbogynyń kezeńi bastaldy. Qazaqstan quramasy úshin bul jaı ǵana kezekti týrnır emes. Sebebi tarıhta tuńǵysh ret álemniń eń myqty semserlesýshileri Astana tórinde bas qosyp otyr. Sondyqtan otandastarymyz óz jerinde óner kórsetip, jankúıerler senimin aqtaýǵa jáne júldeli oryndardan kórinýge baryn salady.
Ulttyq olımpıadalyq komıtettiń málimetinshe, Halyqaralyq semserlesý federatsııasynyń (FIE) qoldaýymen ótetin bul týrnır Qazaqstanda alǵash ret ótkizilip otyr.
FIE kúntizbesine jyl saıyn osy sanattaǵy nebári bes týrnır kiredi. Olar dástúrli túrde Shveıtsarııa, Germanııa, Birikken Arab Ámirlikteri jáne Kanadada ótedi. Bıyl Qazaqstan alǵash ret osy tizimge qosylyp, Ortalyq Azııada álem kýbogyn ótkizgen alǵashqy el atandy.
Týrnırge jalpy 222 áıel jáne 272 er sportshy qatysyp jatyr. Komandalyq saıysta 31 erler jáne 23 áıelder quramasy baq synaıdy. Barlyq qatysýshynyń sany, onyń ishinde jattyqtyrýshylar men tóreshilerdi qosa alǵanda, 1 000 adamnan asady.
– Álem kýbogynyń Qazaqstanda, óz elimizde ótýi bizge erekshe tolqý men úlken jaýapkershilik júkteıdi. Týrnır aldynda Qazaqstan jeńil atletıkalyq sport kesheninde nátıjeli oqý-jattyǵý jıynyn ótkizdik. Oǵan 7-den astam eldiń sportshylary qatysty. Bul jarys aldyndaǵy daıyndyqtyń mańyzdy kezeńine aınaldy. Búginnen bastap jarysty bastadyq. Óz tarapymyzdan el namysyn laıyqty qorǵaý úshin bar kúshimizdi salamyz, - dep atap ótti komanda kapıtany Elmır Álimjanov.
Qazaqstan atynan týrnırge 30 semserlesýshi qatysýda, olardyń qatarynda Rýslan Kýrbanov, Elmır Álimjanov, Erlik Sertaı, Kırıll Prohodov jáne Vadım Sharlaımov bar.
Áıelder arasyndaǵy saıysta 24 semserlesýshi medal úshin synǵa túsedi. Olardyń ishinde Ýlıana Pıstsova, Sofııa Nıkolaıchýk, Karolına Fomına jáne Vladıslava Andreeva bar.
Kimge úmit artamyz? Naýryz aıynyń basynda Rýslan Kýrbanov Germanııada ótken álem kýbogynyń kezeńinde tamasha óner kórsetip, altyn medal ıelengen edi. Ol týrnır barysynda qarsylastaryna des bermeı, fınalda ıtalııalyq Davıde Dı Verolıdi jeńdi. Degenmen komandalyq saıysta júldege talasý qıynǵa soqty. Jerlesterimiz shırek fınalǵa deıin jetip, Shveıtsarııaǵa jol berdi. Soǵan qaramastan, qazaqstandyq semserlesýshiler jekeleı de, komandalyq básekede de júlde úshin talasýǵa qaýqarly ekenin talaı ret dáleldegen. Buǵan álem jáne Azııa chempıonatynyń nátıjeleri dálel.
Elordada ótetin jarysqa álemdik deńgeıdegi juldyzdar da jınalyp otyr. Olardyń qatarynda Olımpıada chempıondary Kokı Kano (Japonııa), Gergeı Shıkloshı (Vengrııa), Olımpıadanyń kúmis júldegeri Andrea Santarellı (Italııa), sondaı-aq, ıtalııalyq Davıde Dı Verolı (álem chempıony), frantsııalyq Aleksandr Bardene (eki dúrkin álem chempıony), mysyrlyq Mohammed El-Saıed (Olımpıadanyń qola júldegeri), japonııalyq Akıra Komata (Olımpıadanyń kúmis júldegeri), chehııalyq ıAkýb ıÝrka (Olımpıadanyń qola júldegeri), belgııalyq Neısser Loıola (álem chempıonatynyń qola júldegeri) bar. Mundaı myqty sportshylardyń Astana tórinde bas qosýy jarys kórkin qyzdyra túspek.
Komandalyq saıysta basty qarsylastardyń qatarynda Frantsııa, Mysyr, Japonııa, Gonkong jáne Italııa quramalary bar. Degenmen Qazaqstan quramasy keıingi jyldary turaqty nátıjelerimen kózge túsip, medal úshin kúresýge laıyq ujymdardyń biri ekenin dáleldep keledi. Sondyqtan jankúıerlerdiń úmiti zor.
Áıelder arasynda estonııalyq Katrına Lehıs (Olımpıada chempıony), Djýlııa Rıtstsı (Olımpıada chempıony), Alberta Santýchcho (Olımpıada chempıony) ekeýi de ıtalııalyq, ońtústikkoreıalyq San Sera (Olımpıadanyń kúmis júldegeri), Marı-Florens Kandassamı (Olımpıadanyń kúmis júldegeri), Aleksandra Lýı-Marı (Olımpıadanyń kúmis júldegeri) ekeýi de frantsııalyq, vengrııalyq Ester Mýharı (Olımpıadanyń qola júldegeri) medalǵa talasady. Komandalyq saıysta sózsiz Italııa, Frantsııa jáne Polsha quramalary favorıt sanalady.
Jarys kestesine zer salsaq, tórt kún boıy kórermendi erler men áıelder arasyndaǵy jeke jáne komandalyq jarystar kútedi. Ashylý saltanaty, jeke saıystardyń jartylaı fınaldary men fınaldary 28 naýryzda ótedi. Al 29 naýryz kúni komandalyq jarystar uıymdastyrylady.
Buǵan deıin elordada alǵash ret semserlesýden álem kýbogy kezeńi ótetinin habarlaǵanbyz.
