Qazaqstandyq saperler Golan jotasynda 1200-den asa jarylǵysh zatty joıdy
ASTANA. KAZINFORM — Ulttyq kontıngenttiń ınjenerlik-saperlik toby BUU mandatyna sáıkes Golan jotasynda júktelgen mindetterdi sátti oryndap keledi, dep habarlaıdy Qorǵanys mınıstrliginiń baspasóz qyzmeti.
2025 jylǵy 11 sáýirden bastap áskerı qyzmetshiler 44 operatsııa júrgizip, 1200-den astam jarylǵysh zat pen 43 qoldan jasalǵan jarylǵysh qurylǵyny joıdy. Sonymen qatar, qazaqstandyq saperler jergilikti aýmaqta, BUU bazalary men baqylaý beketterinde bes izdestirý is-sharasyn ótkizip, mınaly alqaptarǵa úsh barlaý shyǵýyn júzege asyrdy.
Sondaı-aq, anyqtalǵan oq-dárilerge 11 márte aldyn ala zerdeleý jumysy jasaldy. Jaýapkershilik aımaǵynda ınjenerlik-saperlik top áskerı personaldyń, BUU nysandarynyń jáne beıbit turǵyndardyń qaýipsizdigin qamtamasyz etip jatyr.
— Biz mınaly alqaptarǵa barlaý júrgizemiz, BUU bazalary men baqylaý beketterin tekseremiz, jarylǵysh zattar men qoldan jasalǵan jarylǵysh qurylǵylardy joıamyz. Tabylǵan barlyq oq-dári — Sırııa aýmaǵyndaǵy qarýly qaqtyǵystardyń qaýipti murasy, — dedi Bitimgerlik operatsııalary ortalyǵynyń materıaldyq-tehnıkalyq qamtamasyz etý basqarmasynyń ofıtseri maıor Ernar Amantaıuly.
Golan jotalaryna jiberiler aldynda áskerı qyzmetshiler Almaty garnızonyndaǵy Bitimgerlik operatsııalary ortalyǵynda jáne Qonaev garnızonynyń mınasyzdandyrý ortalyǵynda keshendi arnaıy daıyndyqtan ótti. Onda olar gýmanıtarlyq mınasyzdandyrýdyń úsh deńgeıli kýrsyn meńgerdi.
Osylaısha, Qazaqstannyń ınjenerlik áskerleriniń áskerı qyzmetshileri el ishinde ásker men azamattyq halyqtyń qaýipsizdigin qamtamasyz etip qana qoımaı, BUU mıssııalary aıasynda beıbitshilik pen turaqtylyqty nyǵaıtýǵa da eleýli úles qosyp keledi.
Aıta keteıik, 21 qańtarda Qazaqstanda eń jaýapty ári qaýipti áskerı mamandyqtardyń biriniń kásibı merekesi — Injenerlik áskerlerdiń kúni atap ótiledi. Olardyń qatarynda saperler, ınjener-barlaýshylar, mehanık-júrgizýshiler, pontonshylar, kınologter jáne basqa da mamandar bar.