Qazaqstandyq Rune Eaters Dota 2 týrnırindegi oıynyn aıaqtady
ASTANA. KAZINFORM – Dota 2 týrnırinde qazaqstandyq Rune Eaters komandasy Qytaıdyń Team Resilience ujymyna 0:2 esebimen ese jiberip, jarysty aıaqtady. Matchtan keıin komanda oıynshysy Álim Bespaev jeńilistiń sebebi men týrnırden alǵan áseri týraly pikir bildirdi.
Onyń aıtýynsha, komanda úshin eń áserli sátterdiń biri LGD.Pinghu komandasyn jeńgen sáti.
– LGD.Pinghu biz úshin eń myqty qarsylastardyń biri edi. Sol jeńisten keıin búkil komandada alǵa umtylyp, jeńisti jalǵastyrýǵa degen úlken senim paıda boldy. Alaıda Yakult Brothers-pen ótken kezdesýden keıin jaǵdaı ózgerdi. Ol match bizge psıhologııalyq turǵyda áser etip, keıingi oıyndarǵa tyń kúıde shyǵa almadyq, – dedi Álim Bespaev.
Ol óziniń halyqaralyq deńgeıdegi alǵashqy iri týrnıri bolǵanyn aıtyp, jarys úlken tájirıbe syılaǵanyn jetkizdi. Sonymen qatar ol jeńilistiń negizgi sebebi retinde qarsylastyń qysymy emes, daıyndyqtyń jetkiliksiz bolǵanyn atap ótti.
– Komanda ishinde qysym bolǵan joq, kóńil kúı jaqsy boldy. Biraq bizge tártip pen daıyndyq jetispedi. Keıipkerlerdi tańdaý múmkindigimiz de shekteýli boldy. Sondyqtan jeńilistiń basty sebebi osy dep oılaımyn, – dedi oıynshy.
Qola júlde úshin ótken serııada Team Resilience qazaqstandyq Rune Eaters komandasyn eki matchtyń qorytyndysy boıynsha 2:0 esebimen jeńip, úshinshi oryndy ıelendi.
Eske sala keteıik, qazirgi ýaqytta Astanada «Bolashaq oıyndary — 2026» halyqaralyq týrnıri jalǵasyp jatyr. Baıraqty báseke aıasynda Dota 2, Counter-Strike 2, Phygital Shooter, Phygital Basketball jáne ózge de fıdjıtal baǵyttar boıynsha jarystar ótip keledi.
