Qazaqstandyq rejısserdiń debıýttik fılmi Almatyda alǵash ret kórsetiledi
ASTANA. KAZINFORM — Qazaqstandyq «Tańdaý» fılminiń eldegi premerasy 22 tamyzda ótedi, dep habarlaıdy Mádenıet jáne aqparat mınıstrliginiń baspasóz qyzmeti.
Qazaqstandyq rejısser Jannat Alshanovanyń tolyqmetrajdy «Tańdaý» (BECOMING) atty debıýttik fılmi alǵash ret elimizde kórsetiledi. Fılmniń Qazaqstandaǵy premerasy 22 tamyzda Almatyda Qyzqaras Film Festival aıasynda ótedi. Kórsetilimnen keıin fılm rejısserimen kezdesý uıymdastyrylady.
— Týyndynyń álemdik premerasy 2025 jyly Lokarno halyqaralyq kınofestıvalinde ótti. Keıin Pýsan, Tallın, Geteborg kınofestıvalderinde, SXSW London jáne ózge de halyqaralyq alańdarda kórsetildi. Tallın kınofestıvalinde fılm úzdik koprodýktsııa úshin arnaıy marapatqa ıe boldy, — delingen habarlamada.
Fılmde 17 jastaǵy Mıla esimdi qyzdyń oqıǵasy baıandalady. Ol júzgishter komandasyna qosylǵysy keledi. Sóıtip erkin ómir súrip, otbasyndaǵy qıyndyqtan qutylmaq bolady. Alaıda márege jeter tusta onyń ómirin ózgertetin tańdaý jasaýǵa týra keledi. Fılm Qazaqstan, Frantsııa, Nıderland, Lıtva jáne Shvetsııa elderiniń birlesken jobasy retinde túsirilgen. Túsirilim Almaty qalasy men Almaty oblysynda júrgizildi.
Basty rólderdi Tamırıs Janǵazınova, Valentın Novopolskı, Ásel Qalıeva jáne Medına Saǵyndyqova somdady. Fılmniń qoıýshy operatory – Karolın Shampete.
Buǵan deıin elimizde fılmderdegi balaǵat sózder qalaı retteletinin jazǵan edik.
