Qazaqstandyq rejısser Aısultan Seıitov LNGSHOT K-pop tobyna klıp túsirdi
ASTANA. KAZINFORM — Qazaqstandyq klıpmeıker Aısultan Seıitov álemdik mýzyka ındýstrııasynyń ókilderimen jumys isteıtin rejısserler qataryna qosyldy. Onyń K-pop baǵytyndaǵy alǵashqy jumysy ońtústikkoreıalyq LNGSHOT tobyna arnalǵan klıp boldy.
Jańa beınebaıan toptyń 10 qarashada tanystyrǵan S.W.I.S.H. mını-albomyna engen Bananas ánine túsirilgen. Seıitov jobanyń alǵashqy kadrlaryn áleýmettik jelidegi paraqshasynda jarııalap, bul onyń K-pop baǵytyndaǵy debıýti ekenin jetkizdi. Sondaı-aq rejısser birlesken jumysqa múmkindik bergen topqa alǵysyn bildirdi.
— K-pop baǵytyndaǵy alǵashqy jumysym. LNGSHOT tobymen birge osy jobany júzege asyrý men úshin úlken mártebe, — dep jazdy ol Instagram paraqshasynda.
LNGSHOT — 2026 jylǵy qańtarda debıýt jasaǵan ońtústikkoreıalyq jas top. Onyń quramynda tórt ónerpaz bar: Ohyul, Ryul, Woojin jáne Louis.
Az ýaqyt ishinde LNGSHOT qalyń kórermenniń nazaryn aýdardy. Qazir toptyń Instagram jelisindegi resmı paraqshasyna 4 mıllıonǵa jýyq adam jazylǵan. Mýzykanttar sheteldik naryqqa da shyǵýdy kózdeıdi. Soltústik Amerıkada tanymal bolý úshin olar Kakao Entertainment jáne Atlantic Music Group kompanııalarymen kelisim jasasty.
